ذوالفقار علی بی بی سی، اردو ڈاٹ کام، مظفرآباد

سید بشیر احمد اندرابی کہتے ہیں کہ انکا کوئی سیاسی ایجنڈا نہیں ہے

گذشتہ نصف صدی میں یہ پہلا موقع تھا کہ پاکستان کے زیرانتظام کشمیر کے لوگ بھارت کے زیرانتظام کشمیر جا رہے تھے۔

اس وفد کے دورے کا اہتمام بھارتی پارلیمان کی رکن نرمیلا دیش پانڈے کی تنظیم نے کیا تھا۔

اس وفد میں شامل پاکستان کے زیر انتظام کشمیر کی ایک سیاسی جماعت کے رہنما سید بشیر احمد اندرابی کہتے ہیں کہ انکا کوئی سیاسی ایجنڈا نہیں ہے اور وہ شیخ نورالدین ولی کے مزار کی زیارت کرنے جارہے تھے۔

انہوں نے کہا تھا کہ کشمیری صوفی بزرگ شیخ نووالدین ولی نے امن، دوستی، بھائی چارے، اخوت، رواداری اور انسانیت کا پیغام دیا ہے اور ہمارا وفد بھی یہی پیغام لے کر جارھا تھا۔

مسڑ انداربی کا کہنا ہے کہ وفد دیگر بزرگوں کے مزاروں پر بھی حاضری دینا چاہتا تھا۔ انہوں نے کہا تھا کہ وہ ہندوستان اور پاکستان کے درمیان دائمی امن، محبت اور اخوت کے لیے دعا کریں گے اور کشمیر میں امن کے قیام کے لیے بھی دعائیں کریں گے۔

اندرابی کے بیشتر خاندان والے بھارت کے زیر انتظام کشمیر میں ہیں۔ انکی امید تھی کہ وہ اس دورے میں اپنے عزیز واقارب سے مل سکیں گے۔

اس وفد میں شامل لوگوں کا تعلق زندگی کے مختلف شعبوں سے ہے اور ان میں بیشتر وہ کشمیری ہیں جن کے خاندان کشمیر کو تقسیم کرنے والی لائن آف کنڑول کے دونوں جانب بٹے ہوئے ہیں۔

ان بچھڑے ہوئے خاندانوں کے لوگ جہاں کشمیر کے صوفی بزرگ کی درگاہ پر حاضری دینا چاہتے تھے وہاں انکی یہ خواہش بھی تھی کہ وہ اپنے بچھڑے ہوئے عزیزوں سے ملاقات کریں گے۔

اطہر مسعود وانی کے بیشتر رشتہ دار بھارت کے زیر انتظام کشمیر میں ہیں

انھوں نے اپنے عزیزوں کو صرف تصویروں میں دیکھا ہے اور ان سے کبھی ملاقات نہیں کی ہے۔ اور ان خواہش تھی کہ وہ اس دورے کے دوران اپنے پیاروں سے بھی ملیں۔ اس وفد میں شامل دیگر کشمیری خاص طور پرمنقسم خاندانوں کے افراد بھی اس طرح کے جذبات رکھتے ہیں۔