اعجاز مہر
بی بی سی اردو ڈاٹ کام،اسلام آباد |  |
|  جیف ہون کے اچانک دورے کے متعلق نہ پاکستانی حکومت کھل کر کچھ بتا رہی ہے اور نہ ہی برطانوی ہائی کمیشن |
برطانیہ کے وزیر دفاع جیف ہون بھارت کی قیادت سے بات چیت کے بعد دو روزہ دورے پر پاکستان پہنچ گئے ہیں۔ انہوں نے منگل کو اپنے پاکستانی ہم منصب راؤ سکندر اقبال سے ملاقات کی جبکہ صدر جنرل پرویز مشرف اور وزیراعظم شوکت عزیز سے وہ بدھ کو ملاقات کریں گے۔ برطانوی وزیر دفاع دونوں ممالک کا اچانک دورہ کر رہے ہیں اور ان کے دورے کو خاصی اہمیت کا حامل سمجھا جا رہا۔ جیف ہون کے اچانک دورے کے متعلق نہ پاکستانی حکومت کھل کر کچھ بتا رہی ہے اور نہ ہی اسلام آباد میں قائم برطانوی ہائی کمیشن کا کوئی نمائندہ۔ ہائی کمیشن کے میڈیا کے نمائندے سائمن سمارٹ سے جب رابطہ کیا گیا تو انہوں نے صرف اتنا بتایا کہ مسٹر جیف ہون بھارت کا سرکاری دورہ مکمل کر کے پاکستان آئے ہیں اور بدھ کے روز وہ اپنی چھٹی گزارنے کے لیے دوبارہ بھارت جا رہے ہیں۔ منگل کے روز برطانوی وزیر دفاع نے اسلام آباد میں اینٹی نارکوٹکس فورس کی جانب سے منعقد کردہ ایک تقریب میں شرکت کی اور اکیس ٹن ہیروئن، افیون اور دیگر منشیات کے ذخیرے کو ندر آتش کیا۔ یہ منشیات پاکستانی حکومت نے مختلف مواقع پر پکڑی تھیں۔ برطانوی وزیر نے منشیات کی سمگلنگ کی روک تھام کے متعلق پاکستان کے کردار کو سراہا اور کہا کہ آج کی منشیات جلانے کی تقریب دونوں ممالک میں تعاون کا ثبوت ہے۔ اس موقع پر پاکستان میں انسداد منشیات فورس کے سربراہ میجر جنرل ندیم احمد نے دعویٰ کیا کہ ہر سال افغانستان میں تین سو ساٹھ ٹن ہیروئن پیدا کی جاتی ہے۔ ان کے مطابق سالانہ دو سو ساٹھ ٹن ہیروئن یورپ اور امریکہ سمگل ہوتی ہے، ساٹھ ٹن کے لگ بھگ پاکستان میں پکڑی جاتی ہے جبکہ چالیس ٹن افغانستان میں منشیات کے عادی لوگ استعمال کرلیتے ہیں۔ انہوں نے بتایا کہ پاکستان میں پینتیس سے چالیس لاکھ افراد منشیات کی لت میں مبتلا ہیں۔ | 
یہ صفحہ دوست کو ای میل کیجیئے
پرِنٹ کریں
