عدنان عادل بی بی سی اردو ڈاٹ کام، لاہور

سیالکوٹ دھماکے کے بعد بڑے پیمانے پر احتجاج کیے گئے۔

پنجاب کے وزیراعلٰی چودھری پرویز الٰہی کے ترجمان امجد بھٹی نے بی بی سی کو بتایا کہ حکومت نے ڈسٹرکٹ پولیس افیسر (ڈی پی او) نثار سرویا، ڈی ایس پی طہٰ نواز وڑائچ اور ایس ایچ او تھانہ رنگ پورہ آصف حنیف جوئیہ کو معطل کردیا ہے کیونکہ حکومت نے پہلے سے اعلان کیا ہوا تھا کہ اگر کسی جگہ مذہبی دہشت گردی کا واقعہ پیش آیا تو اس کی ذمہ داری وہاں کے متعلقہ ایس ایچ او، ڈی ایس پی اور ایس پی کی ہوگی۔

ترجمان کے مطابق وزیراعلٰی نے ان افسروں کو معطل کرتے ہوئے کہا کہ انھوں نے جامعہ مسجد زینبیہ پر تعینات گارڈز کو صحیح طریقہ سے بریف نہیں کیا تھا کہ انھیں وہاں پر کیا حفاظتی اقدامات لینے ہیں۔ اس لیے یہ لوگ غفلت اور کوتاہی کے مرتکب ہوئے۔

وزیراعلٰی نے کہا ہے کہ سینیئر پولیس افسروں پر لازم ہے کہ وہ اپنی نگرانی کو مؤثر بنائیں اور جو قواعد و ضوابط اور نظم و ضبط کے اصول ہیں انھیں نچلے عملے تک پہنچائیں تاکہ وہ ایمرجنسی صورتحال سے نمٹ سکے۔

وزیراعلٰی نے یہ بھی کہا ہے کہ سیالکوٹ میں زینبیہ مسجد میں دھماکہ کرنے والے اصل ملزم کے بارے میں خاصے شواہد مل گئے ہیں اور حکومت کی ہدایت پر چاروں انٹیلی جنس ایجنسیاں ، اسپیشل برانچ، انٹیلی جنس بیور، آئی ایس آئی اور ملٹری انٹیلی جنس اس واقعہ کی تحقیقات کے لیے مل کر کام کررہی ہیں۔

دوسری طرف آج سیالکوٹ میں آل پاکستان شیعہ ایکشن کمیٹی کے علماء نے ، جو کراچی ، کوئٹہ اور دوسرے شہروں سے جمع ہوئے تھے، کہا کہ ان کا مطالبہ پولیس افسروں کی معطلی نہیں ہے بلکہ حکومت ان فیکٹریوں کو بند کرے جو شیعہ لوگوں کے خلاف نفرت کے فتوے جاری کرتی ہیں۔

ان علماء میں کراچی سے نسیم الحسن شاہ اور ضلعی کوثر ، کوئٹہ سے سید زاہد شاہ، سکھر سے عالم شاہ وغیرہ شامل تھے۔

شیعہ علماء نے ، جن میں جامعہ مسجد زینبیہ کے خطیب اور ان ہلاکتوں کے مدعی فیض کرپالوی شامل تھے، یہ بھی کہا کہ ایک سال میں اب تک تین سو شیعہ دہشت گردی کا نشانہ بنے ہیں اور اب تک کسی واقعہ کے ملزم کو گرفتار نہیں کیا گیا اور نہ کسی کو عدالت سے سزا ملی۔

شیعہ علماء نے کہا کہ گزشتہ پندرہ سال میں ہزاروں شیعہ دہشت گردی کا نشانہ بن چکے ہیں۔ انھوں نے کہا کہ جن ملزموں کو گرفتار کیا گیا وہ اعلٰی عدالتوں سے بری ہوگئے اور حکومت نے انھیں حفاظت کے لیے گارڈز مہیا کیے ہوئے ہیں۔

شیعہ علماء نے کہا کہ اس واقعہ کے چار روز گزرنے کے باجود اب تک گورنر، وزیراعلٰی پنجاب یا کسی ثفاقی وزیر نے جائے وقوع کا دورہ نہیں کیا اور کسی مرنے والے کے لواحقین سے تعزیت کے لیے نہیں گئے۔

علماء نے مطالبہ کیا کہ مرنے والوں کے پسماندگان کے لیے حکومت ایک ایک لاکھ روپے کے بجائے پانچ پانچ لاکھ روپے اور زخمیوں کو تین تین لاکھ روپے ادا کرے اور مرنے والوں کے لواحقین کے لیے ماہانہ وظائف بھی مقرر کرے۔