مبشر زیدی بی بی سی اردو ڈاٹ کام، کراچی

سکیورٹی اہلکار امجد فاروقی کے فلیٹ کی تلاشی لے رہے ہیں

سندھ کے وزیر اعلٰی کے مشیر صلاح الدین حیدر نے بی بی سی کو بتایا کہ امجد فاروقی کے ساتھ گرفتار ہونے والے افراد سے تفتیش کے نتیجے میں سکھر سے تین بھائیوں کو گرفتار کیا گیا ہے۔ ان کے نام یہ ہیں: خالد انصاری، شاہد انصاری اور ساجد انصاری۔

صلاح الدین کا کہنا ہے کہ خالد انصاری پر مئی 2002 میں کراچی کے شیریٹن ہوٹل پر خودکش حملے میں ملوث ہونے کا شبہ ظاہر کیا جا رہا ہے۔ اس حملے میں فرانسیسی بحریہ کے گیارہ اہلکار اور تین پاکستانی مارے گئے تھے۔

انہوں نے کہا کہ مزید آٹھ لوگوں کو کراچی، راولپنڈی اور میر پور خاص سے گرفتار کیا گیا ہے تاہم حکام ان افراد کے نام نہیں بتا رہے۔

صلاح الدین کے مطابق ان افراد کے نام اس وقت ظاہر کرنے سے تحقیقات کا عمل متاثر ہو سکتا ہے۔