اعجاز مہر بی بی سی اردو ڈاٹ کام، گھوٹکی سندھ

ٹوٹے پل کوئی پوچھنے والا بھی نہیں

یہ باتیں اگر آپ صوبہ پنجاب کے شہر صادق آباد سے صوبہ سندھ کے شہر گھوٹکی تک سفر کریں تو آپ کو سننے کو مل سکتی ہیں۔

میرے ساتھ بھی کچھ ایسا ہی ہوا۔ اسلام آباد سے سڑک کے ذریعے مسلسل بارہ گھنٹوں سے بھی زیادہ سفر کرنے کے بعد تھکن سے ہلکی نیند آرہی تھی تو گاڑی میں ساتھ بیٹھے لوگ مندرجہ بالہ باتیں کر رہے تھے۔

اوباڑو سے گھوٹکی تک سڑک پر ایف ڈبلیو او کے تعمیر کردہ نو سے زائد پلیاں ٹوٹ گئی ہیں۔تقریبا تین سال قبل ٹریفک کے لیے کھولے جانے والے’ جی ٹی روڈ، کی نو تعمیر شدہ دو رویہ سڑک پر سفر کے دوران ہمسفروں کی باتوں سے اندازہ ہوا کہ وہ کس قدر ناخوش ہیں۔

گھوٹکی کے رہائشی عبدارزاق نامی وکیل کہہ رہے تھے کہ فوج سے کوئی پوچھنے والا نہیں اگر سویلین ٹھیکدار ہوتا تو بلیک لسٹ ہوجاتا اور کبھی اسے سرکاری ٹھیکہ نہ ملتا لیکن ایف ڈبلیو او سے کوئی پوچھتا ہی نہیں۔ جب انہوں نے کہا کہ ملک میں فوج کی حکومت ہے ان سے کون پوچھ سکتا ہے تو میں نے کہا کہ ملک میں منتخب جمہوری حکومت ہے آپ کیسے کہتے ہیں؟

وکیل نے کہا کہ یہ سب دکھاوا ہے اصل حاکم تو صدر جنرل پرویز مشرف ہیں، ان کی مرضی کے بغیر کوئی کچھ نہیں کر سکتا۔

انشورنس کمپنی کے ایک ملازم علی شیر کا کہنا تھا کہ فوجیوں کو پلیاں بنانی نہیں آتیں۔ ان کے بقول جو بھی ایف ڈبلیو او والوں نے پلیاں بنائی ہیں بیشتر ٹوٹ گئی ہیں۔ انہوں نے کہا کہ فوج کے بارے میں عام تاثر ہے کہ فوج ہر کام اچھا کرتی ہے لیکن انہیں پلیاں بنانی تو نہیں آتیں۔

پرائمری استاد محمد عثمان کا کہنا تھا کہ پچاس برس پرانی سڑک کی پلیاں آج تک خراب نہیں ہوئیں لیکن تین برس پہلے بننے والی پلیاں ٹوٹ گئی ہیں جس سے لگتا ہے کہ ناقص اشیاء استعمال کی گئی ہیں۔

سڑک پر نالیان بن جانے کا سبب ایف ڈبلیو او والے ٹرکوں اور ٹریلرز پر مقرر کردہ مقدار سے زیادہ وزن اٹھانا بتاتے ہیں لیکن بعض لوگ کہتے ہیں کہ وہی ٹرک کراچی سے لاہور اور دیگر شہروں تک جاتے ہیں وزن بھی اتنا ہی ہوتا ہے لیکن سڑک اور پلیاں خراب صرف گھوٹکی اور صادق آباد سیکشن کی کیوں ہوئی ہیں؟

مقامی لوگوں کے مطابق پلیاں ٹوٹنے سے کئی حادثات بھی ہوئے ہیں اور کئی بے گناہ انسان ہلاک ہوئے۔ان کے مطابق پلیاں ٹوٹنے کے بعد ابتدا میں مٹی کی دیواریں کھڑی کی گئی تھیں جس سے تیز رفتار گاڑیاں اچانک رات کو مٹی کے ڈھیروں سے ٹکرا جاتی تھیں لیکن ابھی ’متبادل راستہ‘ کے بورڈ لگا ئے گئے ہیں۔

عام طور پر نئی بنائی جانے والی پلیوں کو پچاس برس تک پائیدار سمجھا جاتا ہے لیکن ’ایف ڈبلیو او، کی پلیاں پانچ برس بھی نہیں چلیں۔

ایف ڈبلیو او کی تعمیر کردہ تباہ حال نو پلیاں دوبارہ بنانے کے لیے ایک نجی کمپنی کو ٹھیکہ دیا گیا ہے اور انہیں کہا گیا ہے کہ آئندہ سال جنوری تک کام مکمل کریں۔