عزیزاللہ خان بی بی سی اردو ڈاٹ کام، کوئٹہ

کوئٹہ میں بھی جرائم بڑھتے جا رہے ہیں

سنیچر کی شام سول ہسپتال میں چار لاشیں لائی گئیں جنھیں کم سے کم پانچ روز قبل قتل کیا گیا تھا۔ کوئٹہ سے کوئی بیس کلو میٹر مغرب میں کلی اغبرگ کے ایک گھر سے سنیچر کی صبح عجیب سی بو آنا شروع ہوئی تو لوگوں نے گھر کا تالا توڑا۔ اندر انھیں ایک عورت کے ساتھ تین بچیوں کی لاشیں ملی ہیں۔ پولیس کے مطابق بچیوں کے نام پلوشہ عمر چھ سال، شاہینہ عمر تین سال اور شگفتہ عمر ڈیڑھ سال ہے۔ ان کے سر پر کلہاڑی کی الٹی طرف سے وار کیے گئے تھے۔

تھانہ نوحصار کے انسپکٹر امین اللہ خلجی نے بتایا کہ میاں بیوی کے درمیان اکثر جھگڑا رہتا تھا۔ جس روز یہ قتل ہوئے ہیں اس روز اختر محمد نے اپنے بھائیوں کو بتایا تھا کہ وہ اپنی بچی کو ڈاکٹر کے پاس لے جا رہا ہے ۔ اس روز کے بعد سے اختر محمد نظر نہیں آیا اور گھر کو تالا لگا ہوا تھا۔

گھریلو ناچاقی اور قتل کی بنیادی وجہ تاحال معلوم نہیں ہے۔ پولیس نے بتایا ہے کہ ملزم کی گرفتاری کے لیے کوششیں کی جا رہی ہیں۔