ہارون رشید بی بی سی اردو ڈاٹ کام، اسلام آباد

یہ واقعہ رات آٹھ بجے کے قریب پیش آیا

اسلام آباد میں پاکستان فوج کے ترجمان میجر جنرل شوکت سلطان نے واقعہ کی تصدیق کرتے ہوئے کہا کہ یہ واقعہ رات آٹھ بجے کے قریب پیش آیا۔ ان کا کہنا تھا کہ ایک شخص گھریلو ساخت کا ایک قدرے چھوٹا بم کوہاٹ میں چھاونی کے علاقے میں پبلک پارک کے قریب نصب کر رہا تھا کہ بم چل پڑا اور وہ شخص موقع پر ہلاک ہوگیا۔

اس کے تقریباً پچیس منٹ بعد قریب ہی نصب ایک اور بم بھی پھٹ گیا لیکن اس سے حکام کا کہنا ہے کہ کوئی جانی نقصان نہیں ہوا۔البتہ غیرمصدقہ اطلاع کے مطابق دوسرے دھماکے میں ایک سرکاری اہلکار ہلاک جبکہ تین زخمی ہوئے ہیں۔

مقامی حکام کا کہنا ہے کہ ہلاک ہونے والا شخص خودکش حملہ آور نہیں تھا۔ البتہ حکام اس کی شناخت ابھی ظاہر نہیں کر رہے۔

مقامی لوگوں نے بتایا کہ بم کوہاٹ میں جنرل آفیسر کمانڈنگ کی رہائش گاہ کے قریب ہوا۔ علاقے کو گھیرے میں لے کر حکام نے تفتیش شروع کر دی ہے۔

قبائلی علاقے جنوبی وزریرستان میں القاعدہ کے مشتبہ افراد کے خلاف فوجی کارروائیوں میں اضافے کے ساتھ ساتھ ملک میں مختلف مقامات پر فوجی ٹھکانوں پر حملوں میں بھی اضافہ دیکھا جا رہا ہے۔

اس وجہ سے فوجی چھاونیوں میں حفاظتی اقدامات پہلے ہی کافی سخت کر دیے گئے تھے۔ لیکن یہ ابھی واضع نہیں کہ اس بم سے نقصان پہنچانے کی کوشش کا وانا کی صورتحال سے تعلق ہے یا نہیں۔