ریاض سہیل حیدرآباد سندھ

قتل ہونے والوں میں چھ افراد کا تعلق ایک ہی خاندان سے ہے

یہ واقعہ آج ہفتہ کی صبح گوٹھ کے نواحی علاقے میں پیش آیا۔ پولیس کے مطابق سولنگی قبیلے کے کچھ مسلح افراد نے سونارو جاگیرانی گاؤں پر حملہ کر کے ایک بچے سعید احمد کو قتل کردیا جبکہ نور احمد گولی لگنے سے زخمی ہوگیا۔

بعد میں جاگیرانی قبیلے کے مسلح افراد نےجوابی کارروائی کرتے ہوئے بٹ ماچھی گاؤں پر حملہ کردیا۔ حملے میں راکٹ اور گرینیڈ استعمال کیے گئے جس کے نتیجے میں زہیراں ماچھی، شریف، محمد مراد، محمد یوسف، نور محمد، اسلم اور گلبہار ہلاک ہوگئے جبکہ تین خواتین سمیت پانچ افراد زخمی ہوگئے۔ قتل ہونے والوں میں چھ افراد کا تعلق ایک ہی خاندان سے ہے۔

زخم ہونے والی خاتون شہمیر ماچھی کا کہنا ہے کہ جاگیرانی مسلح افراد نے گاؤں کے لوگوں کو ایک لائین میں کھڑا کر کے گولی چلادی۔ انہوں نے الزام عائد کیا کہ جاگیرانیوں نے پہلےبھی کئی مرتبہ حملہ کیے ہیں۔

پولیس نے علاقے کا محاصرہ کر کے پچاس سے زائد افراد کوگرفتار کرلیا ہے- اور ضلع بھر سے پولیس طلب کرکے تعینات کردی گئی ہے-

ڈی پی او عبدالواحد سانگری کا کہنا ہے کہ صورتحال کنٹرول میں ہے- ان کا کہنا ہے کہ واقعہ پرانی دشمنی کی وجہ سےپیش آیا ہے۔ انہوں نے کہا کہ پندرہ برس قبل جیکب آباد ضلع میں جاگیرانی قبیلے کے ایک بااثر شخص کو قتل کردیا گیا تھا اور اس کا الزام سولنگی قبیلے پر عائد کیا گیا تھا۔

سولنگی اصل میں مچھیرے قبیلے کی ایک شاخ ہے جن کو عام طور پر پسماندہ سمجھا جاتا ہے-

پیر گوٹھ کا علاقہ جو دریائے کےقریب واقع ہے اور کچے کا علاقہ کہلاتا ہے یہاں کم از کم سات قبائلی برادریاں کارو کاری، زمینوں پر قبضے اور دیگر وجوہات کی بنا پر ایک دوسرے کے خلاف برسر پیکار ہیں اور ان کے درمیان آئے دن تصادم ہوتے ہوتے رہتے ہیں۔ اس صورتحال کی وجہ سےعلاقے میں کھیتی باڑی، کاروبار اور بچوں کی تعلیم بھی متاثر ہوئی ہے-