اعجاز مہر بی بی سی اردو ڈاٹ کام اسلام آباد

یہ فوجی افسران گزشتہ ایک سے ڈیڑھ سال کے عرصے سے گرفتار ہیں

جمعرات کی عدالتی کارروائی میں لاہور ہائی کورٹ راولپنڈی بینچ نے ان فوجی افسران کی حراست کے خلاف داخل درخواستوں کی سماعت بائیس جولائی تک ملتوی کردی ہے۔

درخواست گزاروں کے وکیل ایڈووکیٹ اکرام چودھری کا کہنا تھا کہ القاعدہ سے تعلقات کے شبہ میں حکومت نے کرنل خالد عباسی، کرنل غفار بابر، میجر روہیل فراز، میجر عطاءاللہ، میجر عادل فردوس اور کیپٹن عثمان کو کئی ماہ سے حراست میں لیا ہوا ہے۔

فوج کے نمائندے کے مطابق ان کے خلاف آرمی ایکٹ کے تحت کارروائی ہوگی۔ ان کا کہنا ہے کہ معاملہ حساس نوعیت کا ہے اور وہ عدالت میں تحریری حکم جس کے تحت انہیں حراست میں لیا گیا تھا وہ پیش نہیں کرسکتے۔

اکرام چودھری نے بی بی سی کو بتایا کہ جسٹس اختر شبیر اور جسٹس تنویر بشیر انصاری پر مشتمل بینچ کے سامنے عدالتی نوٹس پر جنرل ھیڈ کوارٹرز کی ’جج ایڈوکیٹ جنرل‘ برانچ کی طرف سے بریگیڈیئر ایوب پیش ہوئے اور انہوں نے عدالت کو بتایا کہ چھ فوجی افسران کو آرمی ایکٹ کے تحت گرفتار کیا گیا ہے۔

وکیل کے مطابق زیر حراست چھ فوجی افسران کے اہل خانہ کی جانب سے دائر کردہ علحیدہ علحیدہ درخواستوں میں وفاقی سیکریٹریز دفاع اور داخلہ کے علاوہ خفیہ ایجنسی آئی ایس آئی کے ڈائریکٹر جنرل کو بھی فریق بنایا گیاہے۔

ایڈووکیٹ اکرام چودھری کے مطابق درخواستوں میں استدعا کی گئی ہے کہ ان فوجیوں کی حراست کو غیر قانونی قرار دے کر انہیں رہا کیا جائے۔

درخواستوں میں عدالت سے یہ بھی کہا گیا ہے کہ حکومت کو پابند کیا جائے کہ کسی زیر حراست افسر کو غیر ملک کے حوالے نہ کیا جائے۔