 |  ازبک شاطر قاسم زانوف |
ازبک شاطر رستم قاسم زانوف نے ورلڈ شطرنج فیڈریشن کے زیرانتظام عالمی چیمپین شپ ڈرامائی انداز میں جیت لی ہے۔ لیبیائی دارالحکومت ٹریپولی میں ہونے والے عالمی چیمپین شپ کے فائنل میں رستم قاسم زانوف نے تین کے مقابلے میں چار بازیاں جیت کر کامیابی حاصل کی جس پر انہیں چورانوے ہزار ڈالر کا انعام بھی دیا گیا ہے۔ اس فائنل میچ پر خاصا تنازعہ بھی تھا کیوں کہ بہت سارے لوگوں نے ٹریپولی میں فائنل کے انعقاد کو لیبیائی رہنما کرنل قذافی کی طرف سے لیبیا کی عالمی تنہائی ختم کرنے کا ایک ہتھکنڈہ قرار دیا تھا۔ دنیا کے آٹھ سرکردہ شاطر اس بات پر بھی ناراض تھے کے آخر دنیا کے مشہور ترین شاطر روس کے گیری کیسپاروف کو کوالیفائینگ راؤنڈ کھیلے بغیر ہی کیوں فائنل مقابلوں میس شرکت کی اجازت دی گئی۔ ایک اور تنازعہ اس بات پر تھا کہ لیبیا نے اسرائیلی شاطروں کے کوچوں کو ویزہ جاری کرنے سے انکار کردیا تھا۔ ٹورنامنٹ کے انتظامات سے اختلاف پر دنیا کے سرکردہ شاطروں نے اس کا بائیکاٹ بھی کردیا تھا۔ چوبیس برس کے رستم قاسم زانوف نے فائنل میں انگلستان کے مائیکل ایڈم کو ہرایا۔ ایڈم کی عالمی رینکنگ نمبر چھ ہے اور ٹورنامنٹ سے پہلے ان کو فتح کے لیے فیورٹ قرار دیا جا رہا تھا۔ | 
یہ صفحہ دوست کو ای میل کیجیئے
پرِنٹ کریں
