بس سروس بند ہونے سے مسافروں کو مشکلات کا سامنا

اتوار کو ہڑتال کا اعلان گزشتہ شب کو ہونے والے واقع کے بعد کیا گیا جس میں بلوچستان کے شہر تربت سے کراچی آنے والی دو بسوں کو چند افراد نے کراچی کے علاقے شیر شاہ سے اغوا کر لیا اور بعد میں بسوں میں سوار چالیس مسافروں کو لوٹنے کے بعد بسوں کو دستی بم مار کر تباہ کر دیا۔

سندھ بلوچستان بس اونرز ایسوسیشن کے صدر اورنگزیب بلوچ نے بی بی سی اردو ڈاٹ کام کو بتایا کہ لیاری کے علاقے سے تعلق رکھنے والے ارشد پپو گروپ کے خلاف اس واقع کی ایف آئی آر درج کروادی گئی ہے۔ انہوں نے کہا کہ یہ گروپ گزشتہ کئی برس سے بسوں کے مالکان کو پریشان کر رہا ہے اور ان کو بھتہ دینے کے لیے دباو ڈال رہا ہے۔

انہوں نے بتایا کہ کراچی سے روزآنہ پچیس بسیں بلوچستان میں تربت، گوادر، پنجگور اور دیگر شہروں کے لیے روانہ ہوتی ہیں اور اتنی ہی بسیں بلوچستان سے کراچی آتی ہیں۔ ان بسوں میں روزآنہ تقریبا ڈیڑھ سے دو ہزار مسافر سفر کرتے ہیں جن کے آمدورفت کا سلسلہ ہڑتال کی وجہ سے رک گیا ہے۔

اورنگزیب بلوچ نے بتایا کہ لیاری کے علاقے میں بسوں کے اٹھارہ اڈے ہیں جن کے بارے میں ان کی ایسوسیشن نے فیصلہ کیا ہے کہ فل الحال ان کو بند کر دیا جائے۔انہوں نے کہا کہ ارشد پپو گروپ کی کارروائیوں کے بارے میں سندھ پولیس کے سربراہ کو چند ماہ پہلے بھی آگاہ کیا گیا تھا تاہم کوئی کارروائی نہیں کی گئی۔