عزیزاللہ خان بی بی سی اردو ڈاٹ کام کوئٹہ

حسام قاضی نے انیس سو اسی میں اداکاری کا آغاز کیا تھا

حسام قاضی کی عمر بیالیس سال تھی اور انھوں نے پسماندگان میں بیوی دو بیٹیاں اور ایک ڈیڑھ ماہ کا بیٹا چھوڑا ہے۔ حسام قاضی کا بیٹا پچیس مئی کو پیدا ہوا تھا اس سے پہلے ان کی دو بیٹیاں ہیں۔

حسام کے بڑے بھائی قاضی جلال نے بتایا ہے کہ حسام قاضی نے اسی کی دہائی میں کالج کے دنوں سے اداکاری کا آغاز کر دیا تھا۔ حسام نے کامرس میں ماسٹر کیا اور کوئٹہ کے ایک کالج میں لیکچرر تعینات ہوئے لیکن اداکاری بھی ساتھ ساتھ جاری رہی۔کوئٹہ مرکز سے اگر چند اداکار قومی سطح پر پہنچ پائے ہیں تو ان میں حسام قاضی سب سے نمایاں سمجھے جاتے ہیں۔

سن دو ہزار میں حسام کو معلوم ہوا کے وہ دل کے عارضے میں مبتلاہیں اور اس دوران علاج بھی کرایا جس کے بعد ڈاکٹروں نے انھیں مکمل صحت یاب قرار دے دیا۔ اس دوران معمولی تکلیف بعض اوقات محسوس ہوتی تھی لیکن مجموعی طور پر حسام اپنے آپ کو بہتر محسوس کرتے تھے۔

حسام قاضی کے چھ بھائی ہیں حسام تیسرے نمبر پر تھا والد اپنا کاروبار کرتے تھے۔ سن دو ہزار میں دل کے عارضے میں مبتلا ہونے کے بعد کالج سے طویل رخصت لے لی اور خود بیوی بچوں سمیت کراچی میں رہنے لگے۔ ان دنوں نجی ٹیلیوژن مرکز کی ایک ڈرامہ سیریل میں کام کر رہے تھے بیوی بچوں کو کچھ روز قبل کوئٹہ بھیج دیا تھا اور خود اتوار کے روز آنے کا کہہ چکے تھے انھیں معلوم نہیں تھا کہ اتوار کو ان کی میت کوئٹہ پہنچے گی۔