ہارون رشید بی بی سی اردو ڈاٹ کام، پشاور

’کے ٹو‘: دنیا کی دوسری سب سے اونچی چوٹی

اس برس ’کے ٹو‘ کو سر کرنے کی پچاسویں سالگرہ منائی جا رہی ہے۔ اسی سلسلے میں اطالوی کوہ پیماؤں پر مشتمل یہ گروپ ’کے ٹو‘ سر کرنے کی کوشش کر رہا ہے۔

گلگت میں شمالی علاقہ جات کے سیکٹری داخلہ کا کہنا ہے کہ اس ٹیم کے ہمراہ سامان برداری کی غرض سے جا رہے مقامی مزدوروں میں سے پانچ بیس کیمپ کے قریب وادیِ شگار میں ایک ندی پار کرتے ہوئے تیز لہروں کی نظر ہوگئے۔ پولیس ان کی لاشیں اکٹھی کرنے میں ناکام رہی ہے۔

حکام کے مطابق اطالوی کوہ پیما محفوظ ہیں اور انہوں نے اس حادثے کے باوجود اپنی مہم جاری رکھی ہوئی ہے۔

وادی شگار گلگت سے تقریباً دوسو میل مشرق میں واقع ہے۔

کے ٹو کو پہلی مرتبہ اکتیس جولائی انیس سو چون میں اطالوی کوہ پیماؤں اچیلی کپماگوننی اور لینو لسڈیلی نے سر کیا تھا۔ اس سالگرہ کی مناسبت سے دو اطالوی ٹیمیں ’کے ٹو‘ کو سر کرنے کی الگ الگ کوشش کر رہی ہیں۔

یہ دونوں ٹیمیں اسی تاریخ کو ’کے ٹو‘ سر کرنے کا ارادہ رکھتی ہیں۔