عدنان عادل
بی بی سی اردو ڈاٹ کام، لاہور |  |
لاہور ہائی کورٹ کے حکم پر ناروے سے پاکستان لائے جانے والے دو بچوں کو واپس ناروے بھجوا دیا گیا ہے۔ حنان ممتاز اور خاقان ممتاز کو ان کے والد نسیم ممتاز دو سال قبل ایک عدالتی حکم کی خلاف ورزی کرتے ہوئے پاکستان لے آئے تھے۔ نسیم ممتاز اور ان کی اہلیہ کے درمیان اختلافات پیدا ہونے کے بعد ناروے کی ایک عدالت نے دونوں کمسن بچوں کی والدہ کو ان کا سرپرست مقرر کیا تھا جبکہ نسیم ممتاز کو بچوں سے ملاقات کی اجازت تھی۔ دونوں بچے دو سال قبل ناروے میں لاپتہ ہو گئے تھے۔ انٹرپول نے معلوم کیا کہ نسیم ممتاز بچوں کو لے کر پاکستان آگیا ہے تو اسلام آباد میں ناروے کے سفارتخانے نے لاہور ہائی کورٹ میں بچوں کی برآمدگی کے لیے حبس بیجا کی درخواست دائر کی۔ لاہور ہائی کورٹ نے ملزم نسیم ممتاز کو طلب کیا تھا لیکن وہ عدالت میں حاظر نہیں ہوا۔ عدالت نے گزشتہ سماعت پر پولیس کو اختیار دیا تھا کہ وہ بچوں کو برآمد کرانے کے لیے ملزم کے علاوہ اس کے باپ، بھائی اور بہن یا کسی اور ایسے رشتے دار کو بھی گرفتار کرسکتی ہے جو اسے پناہ دیتا ہو۔ پولیس نے عدالت عالیہ کے حکم کے مطابق ملزم کے بھائی فاروق ریاض، باپ چودھری ممتاز اور اس کی بہن کو حراست میں لے لیا تھا اور اس کا بینک اکاؤنٹ بھی عدالت کے حکم کے مطابق منجمد کردیا گیا تھا۔ ناروے سفارت خانہ کے وکیل اصغر حیدر نے کہا کہ ملزم نے ہفتے کے روز دونوں بچوں کو ناروے کے سفارت خانہ کے حوالہ کر دیا تھا اور بچے اتوار کی صبح ناروے روانہ ہوگۓ تھے۔ پیر کو ملزم خود بھی عدالت عالیہ میں پیش ہوگیا۔ چیف جسٹس چودھری افتخار نے حبس بیجا کی درخواست قبول کرتے ہوئے رٹ درخواست کا فیصلہ سنادیا اور مخالف فریق کی رضامندی پر ملزم کو کوئی سزا نہیں دی گئی۔ | 
یہ صفحہ دوست کو ای میل کیجیئے
پرِنٹ کریں
