علی سلمان لاہور

جھنگ کی نشست اعظم طارق کے قتل کے باعث خالی ہوئی تھی

شیخ وقاص اکرم تقریبا دس ہزار ووٹوں کے فرق سے کامیاب ہوئے۔اس حلقہ سے بڑے عرصہ کے بعد مسلم لیگ کے امیدوار کو کامیابی حاصل ہوئی ہے۔

اتوار کو ہونے والے پولنگ کے غیر حتمی تنائج کے مطابق مسلم لیگی امیدوار شیخ وقاص نے اکیاون ہزار چار سو انیس ووٹ حاصل کیے جبکہ ان کے مخالف مولانا عالم طارق نے اکتالیس ہزار پانچ سو انچاس ووٹ حاصل کیے ۔تیسرے نمبر پر پاکستان عوامی تحریک کے حسن محی الدین رہے انہوں نے بارہ ہزار سات سو ستاسی ووٹ حاصل کیے ہیں۔

حکومت پنجاب کے ترجمان کے مطابق وزیراعلی پنجاب چودھری پرویزالٰہی نے شیخ وقاص کو مبارکباد دی ہے۔

گزشتہ سال اکتوبر میں کالعدم سپاہ صحابہ کے سربراہ اعظم طارق کے قتل سے یہ نشست خالی ہوگئی تھی۔

مولانا اعظم طارق تین بار اس نشست سے کامیاب ہوۓ تھے۔

اس بار ان کے بھائی عالم طارق نے آزاد پارلیمانی گروپ کی طرف سے انتخاب میں حصہ لیا تھا اور ان کا مقابلہ حکمران جماعت پاکستان مسلم لیگ کے شیخ وقاص تھا ۔شیخ وقاص بھی سابق ایم پی اے شیخ اقبال کے بھتیجے ہیں۔شیخ اقبال کو بھی چند سال قبل قتل کر دیا گیا تھا۔

اس طرح یہ مقابلہ دو مقتولین کے سیاسی ورثا کے درمیان تھا جس میں مولانا اعظم طارق کے سیاسی وارث شکست کھا گئے۔

تیسرے نمبر پر آنے والے امیدوار حسن محی الدین قادری کا تعلق علامہ طاہر القادری کی جماعت عوامی تحریک سے ہے۔

جھنگ انیس سو پچاسی سے فرقہ وارانہ شدت پسندی کا مرکز رہا ہے اور دیوبندی تنظیم کالعدم سپاہ صحابہ پاکستان کی بنیاد بھی اسی شہر میں رکھی گئی تھی۔

اتوار کی صبح آٹھ بجے دو سو بائیس پولنگ اسٹیشنوں پر پولنگ شروع ہوئی تو سیکیورٹی کے سخت انتظامات تھے۔

جھنگ میں شیعہ سنی کشیدگی اور ممکنہ ہنگامہ آرائی کو روکنے کے لیے پولیس کی بھاری نفری کے علاوہ رینجرز بھی تعینات تھے ۔تاہم اس کے باوجود ایک دو مقام پر لڑائی جھگڑے کی اطلاعات ملی لیکن کوئی جانی نقصان نہیں ہوا۔