عدنان عادل بی بی سی اردو ڈاٹ کام، لاہور

قاضی حسین احمد نے صدر مشرف کو وردی اتارنے کے وعدے کو پورا کرنے کی تلقین کی ہے

قاضی حسین احمد نے کہا کہ مشرف اسی طرح جائیں گے جس طرح بے نطیر بھٹو کے ساتھ فاروق لغاری اور نوازشریف کے ساتھ غلام اسحاق خان رخصت کردیے گۓ تھے۔

لاہور میں منصورہ میں جماعت اسلامی کی پانچ روزہ تربیت گاہ سے خطاب کرتے ہوۓ قاضی حسین احمد نے کہا کہ اکتیس دسمبر سن دو ہزار چار سے پہلے صدر مشرف وردی اتاردیں ورنہ متحدہ مجلس عمل ان کے خلاف زبردست تحریک چلاۓ گی۔

امیر جماعت اسلامی نے کہا کہ ”مشرف پہلے ہی آئین توڑ چکے ہیں اور اب دوبارہ آئین توڑنے سے باز رہیں۔ اگر وہ غیر آئینی طور پر اقتدار میں رہنے پر اصرار کریں گے تو ہم ان کے خلاف زبردست تحریک چلائیں گے اور جب ہم تحریک چلاتے ہیں تو پھر کوئی حکومت ٹھہر نہیں سکتی۔”

وانا آپریشن کا ذکر کرتے ہوۓ قاضی حیسن احمد نے کہا کہ قبائل سے معاہدہ ہوگیا تھا لیکن امریکہ نے اسے قبول نہیں کیا جس کی وجہ سے حالات بگڑ گۓ۔