ہارون رشید بی بی سی اردو ڈاٹ کام، پشاور

’جماعت کا کوئی رکن کابینہ میں شامل نہ ہو‘

جماعت کی اعلیٰ قیادت کی جانب سے بھیجے گئے اس بیان میں واضح کیا گیا ہے کہ ان کا اختلاف وزارت یا عہدے کی وجہ سے نہیں بلکہ اصولوں، مقاصد اور مجلس کے منشور کو عملی جامہ پہنانے کی وجہ سے تھا۔

بیان میں مزید تنبیہ کی گئی ہے کہ اگر کسی کو جے یو آئی (س) کے نام پر جماعت کو بائی پاس کر کے کابینہ میں شامل کیا گیا تو یہ ہارس ٹریڈنگ ہوگی اور اس کے خلاف سیاسی اور سماجی دونوں میدانوں میں جنگ لڑی جائے گی۔

جماعت نے اپنے اراکین صوبائی اسمبلی پر بھی واضح کیا (جن کی سرحد میں تعداد صرف دو ہے) کہ اگر انہوں نے کابینہ میں شامل ہونے کا فیصلہ کیا تو وہ اپنے آپ کو پارٹی سے خارج تصور کریں۔

جے یو آئی سمیع الحق گروپ کا کہنا ہے کہ اس کے اصولی اختلافات چلے آ رہے ہیں جس کی وجہ سے جماعت کی صوبائی قیادت مجلس سے کنارہ کشی کا اعلان بھی کر چکی ہے۔ جبکہ بعد میں جمعیت کی مرکزی شوریٰ صوبائی کابینہ میں شامل نہ ہونے کا بھی فیصلہ کر چکی ہے۔

اخباری اطلاعات کے مطابق گزشتہ دنوں صوبائی حکومت نے کابینہ میں اضافے کا فیصلہ کیا تھا جس کے مطابق دو وزیر جے یو آئی (ف) اور دو جماعت اسلامی جبکہ ایک ایک چھوٹی جماعتوں سے لینے تھے۔ لیکن نئے بیان سے ظاہر ہوتا کہ ایم ایم اے میں اختلافات اپنی جگہ بدستور قائم ہیں۔