عدنان عادل، بی بی سی ڈاٹ کام ، لاہور

پولیس نے بتایا ہے کا ایک قبیلےکے افراد نے معمولی جھگڑے کی بناپر دوسرے قبیلے پر حملہ کر کے چار افراد کو ہلاک اور بیس سے زیادہ کو زخمی کر دیا۔

بعض مقامی افراد کا کہنا ہے کہ ہلاک ہونے والوں کی تعداد نو ہے ۔تاہم متعلقہ تھانہ گنجیال کی پولیس نے اس بات کی تردید کی ہے۔

خوشاب سے تیس کلومیٹر دور قائد آباد کے گاؤں اُترا میں اترا قبیلہ کے حاجی چراغ ذیلدار کے لوگوں کا مسلم شیخ قبیلہ کے حاکم سے چند روز پہلے جھگڑا ہوا تھا لیکن مقامی افراد نے صلح کرادی تھی۔

اتوار کی رات دونوں قبیلوں کی عورتوں میں ایک بار پھر جھگڑا ہوگیا جس پر ذیلدار گروپ کے لوگوں نے مسلم شیخ قبیلہ کے افراد پر فائرنگ کردی۔

گنجیال تھانہ کے نائب محرر نے بی بی سی کو بتایا کہ چار افراد قتل ہوئے ہیں جن میں محمد یوسف اس کے دو بیٹے محمد احسان اور محمد حبیب اور ان کی ایک قریبی رشتہ دار امیر خاتون شامل ہیں۔

پولیس کے مطابق واقعہ کی ایف آئی آر درج کرلی گئی ہے۔ واقع کی ابتدائی رپورٹ میں چھتیس ملزم نامزد کیے گئے ہیں جبکہ تیس نامعلوم افراد کے خلاف مقدمہ درج کیا گیا ہے۔