محمد ارسلان کراچی

شہر کے مختلف علاقوں میں تمام پولنگ اسٹیشنوں پر پولیس اور رینجرز کی بھاری نفری تعینات تھی جس کے باوجود پولنگ کے دوران توڑ پھوڑ، ہنگامہ آرائی اور تشدد کے واقعات پیش آئے۔

بہت سے مقامات پر ہنگامہ آرائی کرنے والوں پر پولیس نے لاٹھی چارج بھی کیا۔

ڈی آئی جی طارق جمیل نے بتایا کہ ہلاکتوں کے سلسلے میں اب تک پندرہ افراد کوگرفتار کیا جاچکا ہے۔

ہلاک ہونے والوں میں دو کا تعلق ایم کیو ایم اور دو کا متحد مجلس عمل سے ہے۔

صبح سب سے پہلے فائرنگ ملیر کے علاقے میں ہوئی جہاں چند نامعلوم موٹر سائیکل سوارں نے کیمپوں پر فائرنگ کی اور فرار ہوگئے۔

زخمیوں کو ہسپتال پہنچایا دیا گیا جہاں انہیں فوری طبی امدار دی گئی۔ بہت سے زخمیوں کی حالت نازک ہے۔

دوپہر کے وقت فائرنگ کراچی غربی کے علاقے سعیدآباد میں کی گئی جس میں متحدہ قومی موومنٹ کا کارکن سینے میں گولی لگنے سے ہلاک ہوا۔

مختلف علاقوں میں فائرنگ کا تبادلہ بھی ہوا ہے، زخمیوں کو ہسپتالوں میں پہنچانے والے ایدھی کے رضاکار محمد حنیف نے بی بی سی کوبتایا کہ ہمیں پولنگ اسٹیشنوں میں موجود زخمیوں کو بھی اٹھانے نہیں دیا گیا ہے اور دوگروپوں کے درمیان فائرنگ کی وجہ سے ہمیں امدادی کام میں سخت مشکلات کا سامنا ہے۔

صبح سے جب پولنگ کا آغاز ہوا تو شہر کے بہت سے پولنگ اسٹیشن خالی پڑے تھے، مگر دوپہر کے بعد پولنگ اسٹیشنوں پر لوگوں نے آنا شروع کیا۔

شہر کے بیشتر علاقوں میں سڑکوں پر احتجاجاً ٹائر بھی جلائے گئے ہیں۔

واضح رہے کہ آج کراچی میں قومی اسمبلی کی تین اور صوبائی اسمبلی کی ایک نشست پر ضمنی انتخابات ہورہے ہیں۔