اعجاز مہر بی بی سی اردو ڈاٹ کام، اسلام آباد

’کشمیری اپنی مرضی سے انتخابات کا بائیکاٹ کرتے ہیں‘

ترجمان نے دعویٰ کیا کہ کشمیریوں نے خود انتخابات کا بائیکاٹ کیا ان پر کوئی دباؤ نہیں تھا اور ماضی میں بھی وہ انتخابات کا بائیکاٹ کرتے رہے ہیں۔ ان کا کہنا تھا کہ ووٹوں کی کم شرح کو شدت پسندی سے منسوب نہیں کیا جا سکتا، کیونکہ کشمیری سیاسی رہنما انتخابات کے خلاف مہم چلا رہے تھے۔

ان کی رائے تھی کہ بھارت کے زیر انتظام کشمیر میں انتخابات کی اقوام متحدہ کی قراردادوں کے مطابق کوئی قانونی حیثیت نہیں۔

ان کا کہنا تھا کہ بھارت میں انتخابات کے دوران پاکستان بڑا محتاط رہا ہے اور خبرداری سے تمام بیانات جاری کئے کہ کہیں صدر مشرف اور وزیر اعظم واجپئی میں رواں سال کے ابتدا میں مذاکرات کا جو ماحول بنایا گیا تھا وہ متاثر نہ ہو۔ ترجمان نے امید ظاہر کی کہ دونوں ممالک میں مذاکرات کا عمل جاری رہے گا۔

محبوبہ مفتی الیکشن ریلی کے دوران

مسعود خان کا کہنا تھا کہ عراق میں انسانی حقوق کی خلاف ورزیوں پر پاکستان نے شدید رد عمل ظاہر کیا تھا۔ عراقی قیدیوں سے امریکہ اور اس کی اتحادی افواج کا سلوک شرمناک تھا جو کہ جنیوا کنوینشن کی خلاف ورزی بھی ہے اور عالمی برادری کے لئے بڑا چیلنج بھی ۔

پاکستانی حدود میں امریکی فوج کے داخل ہونے کے متعلق ترجمان کا کہنا تھا کہ پاکستان نے امریکہ سے احتجاج کیا تھا اور امریکہ نے معذرت بھی کی اور کہا تھا کہ وہ پاکستان کی جغرافیائی سالمیت اور خود مختاری کا احترام کرتے ہیں۔

سابق وزیراعظم نواز شریف خاندان کی سعودی عرب میں جلاوطنی کے متعلق ڈیل یعنی سمجھوتے کے سوال پر ترجمان کا کہنا تھا کے وہ ایسی کسی ’ڈیل، سے لاعلم ہیں۔