علی سلمان لاہور

مسلم لیگ (ن) پنجاب کے صدر سردار ذوالفقار علی کھوسہ اور نائب صدر بنیامین رضوی جمعہ کو لاہور سے روانہ ہوکر لندن پہنچے جبکہ مسلم لیگ کے پارلیمانی رہنما اسحاق ڈاراور مرکزی رہنما محمد آصف پہلے ہی پہنچ چکے ہیں۔

بنیامین رضوی نے لاہور کے ہوائی اڈے پر اخبار نویسوں کو بتایا کہ صوبہ سرحد اور سندھ سمیت ملک بھر سے مزید رہنما بھی لندن جانے کی تیاریاں کر رہے ہیں اور متعدد کو ویزے لگنے کا انتظار ہے ۔

انہوں نے کہا کہ شہباز شریف کی سربراہی میں اٹھارہ اپریل سے ایک اہم اجلاس شروع ہوجاۓ گا ۔جس میں ملکی حالات کے علاوہ ان کی واپسی کا لائحہ عمل بھی طے کیا جاۓ گا۔

مسلم لیگ کے صدر میاں شہباز شریف کے بارے میں پاکستان کی ایک اعلی ترین عدالت نے فیصلہ دیا کہ انہیں وطن واپس آنے سے نہ روکا جاۓ اس فیصلے کے بعد میاں شہباز شریف نے اپنے بیان میں وطن واپسی کا عندیہ دیا تھا تاہم تاحال ان کی جانب سے واپسی کی کسی تاریخ کا اعلان نہیں کیا گیا ہے ۔