مسعود عالم بی بی سی اردو ڈاٹ کام

جیلوں میں بھی طبقاتی تقسیم ہوتی ہے

ان میں ایک انجینئر ہے، ایک وکیل، دو ایک سرکاری افسر، اور چند کاروباری حضرات جن کی کلائیوں پر مہنگی گھڑیاں ہیں اور گلے میں سونے جیسی دھات کی زنجیریں۔ آخر الذکر افراد احتساب بیورو کی پکڑ میں ہیں۔ ان میں سے کچھ کو سزا ہو چکی ہے، باقی مقدمے بھگت رہے ہیں۔

یہیں پاک فضائیہ کے ایک سابق افسر الطاف عزت بھی ہیں جنہیں مالی بدعنوانی کے الزام میں کورٹ مارشل کے ذریعے چھ سال قید کی سزا ہوئی ہے، جس میں سے آٹھ نو ماہ وہ گزار چکے ہیں۔

بندہ محبوس کے اوقات  شام کی چائے ہوتی ہے، سیاست پر لمبی لمبی بحثیں ہوتی ہیں اور بیڈمنٹن کورٹ میں گھنٹوں کھیل ہوتا ہے

اور ہاں خدمت کے لئے یہاں بھی ’مشقتی’ یا خادم موجود ہیں، جو سرکاری بیٹمین جتنے پھرتیلے تو شاید نہ ہوں لیکن خود کو خوش قسمت سمجھتے ہیں کہ جیل کے عملے یا زور آور قیدیوں کی غلامی کرنے کی بجائے بی کلاس کے معزز قیدیوں کے لئے کام کر رہے ہیں۔

اس آرام دہ ماحول میں اگر کوئی مشکل ہے تو صرف یہ احساس ہے کہ یہاں سے جانا، اور کسی کا ملاقات کو آنا آپ کے اختیار میں نہیں۔

وقت گزاری کے لئے الطاف نے لمبی لمبی صورتیں یاد کرنی شروع کر دی ہیں اور اس وقت جو کتاب ان کے ہاتھ میں ہے وہ وظائف کا مجموعہ ہے جس میں سے بیشتر وظیفے وہ یاد کر چکے ہیں۔ ’یہاں آنے سے پہلے میں مذہب سے اتنا قریب نہیں تھا جس قدر موقعہ مجھے یہاں ملا ہے۔ ایسا نہیں کہ سب جیل میں یہی کرتے ہیں۔ کچھ غلط کاموں میں بھی پڑ جاتے ہیں۔ اپنے اپنے مزاج کی بات ہے۔’