خواتین کے حقوق کا یہ مسودۂ قانون پاکستان پیپلز پارٹی کی ایک خاتون رکن نے پیش کیا تھا جس میں عورتوں کے خلاف حدود آرڈینیس سمیت تمام امتیازی قوانیں کو ختم کرنے کا مطالبہ کیا گیا تھا۔

لیکن اسلام آباد میں بی بی سی کے نامہ نگار ظفر عباس نے اپنے مراسلے میں بتایا ہے کہ اس بل کے پیش ہونے کے بعد نہ صرف حکمراں اتحاد کی جماعتوں کے کچھ قدامت پسند ارکان بلکہ حزبِ اختلاف کے رکن بھی اس بل کی سخت مخالفت کر رہے ہیں۔

پاکستان کی پارلیمان میں کسی مسودۂ قانون پر اس طرح کی سیاسی صورتِ حال ماضی میں شاذ شاذ ہی سامنے آئی ہے۔

پیپلز پارٹی کی رکنِ اسمبلی شیری رحمٰن کی طرف سے بل پارلیمان میں پیش کیئے جانے کے بعد، مسلم لیگ نواز گروپ نے مخالفت کا آغاز کیا۔ تاہم کچھ ارکانِ اسمبلی نے جن میں کئی خواتین شامل تھیں، بالواسطہ اس بل کی حمایت کی۔

حکمراں اتحاد کی کشمالہ طارق نے اس موقع پر کہا کہ اس موضوع پر پارٹی لائن سے بالا تر ہوکر اتفاقِ رائے پیدا کرنے کی کوشش جاری ہے جس کی کامیابی کی صورت میں حقوقِ نسواں کے بل کو کافی حمایت حاصل ہو جائے گی۔

لیکن قدامت پسند اراکینِ اسمبلی کا کہنا تھا کہ عورتوں سے متعلق قوانین اسلام کے نام پر بنے ہیں جنہیں تبدیل نہیں کیا جا سکتا۔

اس بل کی حمایت اور مخالف کا محور دو اہم نکات ہیں ایک یہ کہ جب کوئی عورت اپنے قبیلے سے باہر شادی کرتی ہے تو اسے غیرت کے نام پر اکثر مار دیا جاتا ہے۔ دوسرا مسئلہ حدود آرڈینیس کا ہے جسے انیس سو اسی کی دہائی میں اسلامی سزائیں دینے کی غرض سے نافذ کیا گیا تھا۔