عدنان عادل بی بی سی اردو ڈاٹ کام، لاہور

وانا آپریشن پر وکلاً معترض

جمعہ کو ملک بھر میں وکلاء تنظیموں نے وانا میں کی جانے والی فوجی کاروائی کے خلاف احتجاجی جلسے منعقد کیے جنکامطالبہ پاکستان بار کونسل کے زیراہتمام قومی وکلا کنوینشن میں کیا گیا تھا۔

جمعہ کی صبح ہائی کورٹ کی عمارت کے کیانی ہال میں لاہور ہائی کورٹ بار ایسوسی ایشن کا اجلاس ہوا جس میں سو سے زیادہ وکلاء نے شرکت کی اور قرار داد منظور کی کہ وانا میں فوجی آپریشن فورا بند کیا جاۓ ۔

اجلاس میں کہا گیا کہ سپریم کورٹ کے سینیئر ترین جج اور سپریم کورٹ بار ایسوسی ایشن کے صدر پر مشتمل ایک کمیشن بنایا جاۓ جو اس واقعہ کی تحقیقات کرے۔

وانا آپریشن اور پاکستانی وکلاً  صدر جنرل پرویز مشرف وانا میں آپریشن کرکے صدر بش کی انتخابی مہم چلا رہے ہیں کیونکہ انہیں پتا ہے کہ اگر بش ہار گۓ تو وہ بھی وردی اور اقتدار سے محروم ہوجائیں گے۔ لاہور ہائی کورٹ بار ایسوسی ایشن صدر

بار ایسوسی ایشن نے صدر جنرل پرویز مشرف سے اپنے عہدہ چھوڑنے کا مطالبہ بھی کیا۔

لاہور ہائی کورٹ بار ایسوسی ایشن کے صدر احمد اویس نے تقریر کرتے ہوۓ کہا کہ’ ہم ایک سانحہ سے گزر رہے ہیں اور افواج پاکستان جنرل مشرف کے کہنے پر قبائیلیوں کا خوں بہا رہی ہیں اور ہم اس کا خون بہا مانگتے ہیں‘۔

انھوں نے کہا کہ صدر جنرل پرویز مشرف وانا میں آپریشن کرکے صدر بش کی انتخابی مہم چلا رہے ہیں کیونکہ انہیں پتا ہے کہ اگر بش ہار گۓ تو وہ بھی وردی اور اقتدار سے محروم ہوجائیں گے۔

ان کا کہنا تھا کہ جنرل مشرف یہ کاروائی کرکے صدر بش سے اپنی وفاداری دکھارہے ہیں جس کی ہم پُرزو مذمت کرتے ہیں۔

احمد اویس نے کہا کہ قبائلیوں کے پاکستان پر بہت احسانات ہیں اور افسوس ہے کہ آج ہم اس طرح ان احسانات کا بدلہ اُتار رہے ہیں۔

بار کے صدر نے کہا کہ قبائیلیوں کے خون کا ہر قطرہ مقدس ہے اور ہم اس کا حساب لیں گے اور جلد اس کے خلاف احتجاجی جلوس نکالیں گے۔