ہارون رشید بی بی سی اردو ڈاٹ کام، پشاور

اکا دکا مقامات پر ہلکے اسلحے سے مزاحمت جاری ہے

وانا کے رہائشیوں نے بتایا کہ نامعلوم افراد نے، جو القاعدہ کے ارکان بھی ہوسکتے ہیں رات سوا تین بجے ژڑی نور کیمپ پر حملہ کیا جو تقریبا دو گھنٹوں تک جاری رہا۔ اس دوران دونوں جانب سے بھاری اسلحے کا استعمال کیا گیا ہے۔

ابتدائی طور پر دونوں جانب جانی نقصان کی کوئی اطلاع نہیں ہے۔

یہ تازہ حملہ حکومت کی جانب سے قبائلی جرگے کو محاصرے والے علاقے میں جانے اور مزاحمت کرنے والوں سے بات چیت کے لئے عارضی جنگ بندی کے اعلان کے چند گھنٹوں بعد ہوا ہے۔ اس سے قبل حکام نے یرغمال بنائے گئے سرکاری اہلکاروں اور فرنٹیر کور کے سپاہیوں کی رہائی تک جنگ بندی سے انکار کر دیا تھا۔

لڑائی میں جمعہ کی سہ پہر سے کمی آئی ہے البتہ اکا دکا مقامات پر ہلکے اسلحے سے مزاحمت جاری ہے۔ حکام کا کہنا تھا کہ ہفتے کے روز لڑائی میں فرار ہونے کی کوشش کرنے والے دو غیرملکی، جن کے بارے میں خیال ہے کہ وہ چیچن ہیں، ہلاک ہوگئے ہیں۔

مزید گرفتاریوں کی اطلاع نہیں ہے البتہ اتوار کو حراست میں لئے جانے والوں سے پوچھ گچھ جاری ہے۔

اس طرح اب تک حکام کے مطابق چار روز کی کاروائی میں ہلاک ہونے والے غیرملکیوں کی تعداد اٹھارہ ہوگئی ہے۔

وانا میں قبائلی جرگے کے ذریعے مسئلہ کا حل تلاش کرنے کی کوششوں کے بارے میں ان کا کہنا تھا کہ حکومت نے تین شرائط قبائلیوں کے سامنے رکھی ہیں۔ محمود شاہ نے بتایا کہ ان شرائط میں قبائلیوں سے بارہ لاپتہ سپاہیوں اور دو تحصیلداروں کو (اگر وہ ان کے قبضے میں ہیں) حوالے کرنے، مزاحمت کرنے والوں کو ہتھیار ڈالنے اور غیرملکیوں کو علاقہ چھوڑ دینے کے مطالبات شامل ہیں۔

اخبارات میں بارہ فوجیوں کی ہلاکت کی خبر کی تصدیق کرنے سے انہوں نے گریز کیا اور کہا کہ یہ صرف فوجی حکام کر سکتے ہیں جبکہ ان کا کہنا تھا کہ فرنٹیر کور کو کوئی تازہ نقصان نہیں اٹھانا پڑا۔

انہوں نے یقین دلایا کہ گرفتار افراد کو امریکہ کے حوالے نہیں کیا جائے گا۔ ان کا کہنا تھا کہ اسامہ یا ایمن الزواہری کے بارے میں معلومات درست نہیں تھیں۔ ان کا کہنا تھا کہ جنوبی وزیرستان سے القاعدہ کا صفایا کرنے میں ایک ماہ کا وقت لگ سکتا ہے۔