صدرِ پاکستان جنرل پرویز مشرف آج سعودی عرب کے شاہ فہد اور ولی عہد شہزادہ عبداللہ سے مذاکرات کرے والے ہیں۔ پاکستانی صدر سنیچر کو سعودی عرب کے دو روزہ دورے پر اچانک جدہ پہنچے تھے۔ سنیچر کو انہوں نے عمرہ ادا کیا جس کے بعد آج وہ ریاض پہنچیں گے۔ توقع کی جا رہی ہے کہ شاہ فہد اور ولی عہد شہزادہ عبداللہ سے ان کی بات چیت کا مرکمی موضوع عراق، افغانستان اور پاکستان اور بھارت کے درمیان امن مذاکرات ہوں گے۔ پاکستان کے وزیر خارجہ خورشید محمود قصوری، وزیر اطلاعات شیخ رشید احمد، وزیر سائنس اور ٹیکنالوجی اویس لغاری اور دفاعی پیداوار کے وزیر مملکت حبیب اللہ وڑائچ بھی صدر کے ہمراہ ہیں۔ مبصرین صدر مشرف کے اس دورہِ سعودی عرب کو برطانوی وزیر خارجہ جیک سٹرا، فرانسیسی وزیر خارجہ ڈومنک ویلیپاں اور جرمنی کے ایک نائب وزیر کے حالیہ دورہ پاکستان اور امریکی وزیر خارجہ کولن پاول کے متوقع دورے کے تناظر میں خاصی اہمیت دے رہے ہیں۔ اطلاعات کے مطابق ان تمام دوروں میں پاکستان کے جوہری پروگرام کے بارے میں تفصیل سے مذاکرات ہوئے۔ اسلام آباد سے صحافی احتشام الحق نے بی بی سی اردو سروس کو بتایا کہ دارالحکومت میں مبصرین ان عالمی رہنماوں کے دورہ پاکستان کا ایران سے موازنہ کر رہے ہیں۔ ایران کے جوہری پروگرام کے حوالے سے بھی ان تمام رہنماؤں نے تہران کا دورہ کیا تھا۔ انہوں نے کہا کہ سعودی عرب کیونکہ امریکہ کا ایک قریبی اتحادی اور خطے کا ایک بااثر ملک ہے اور پاکستان کا دوست بھی تصور کیا جاتا ہے اس لیے صدر مشرف سعودی قیادت سے مشورہ کے لیے سعودی عرب گئے ہیں۔ سعودی عرب میں دہشت گردی کی مہم کے خلاف پاکستانی فوج کو معاونت کے لیے بھیجنے کی ایک تجویز کے بارے میں انہوں نے کہا کہ صدر مشرف پہلے ہی کہ چکے ہیں کہ پاکستان سعودی عرب کی بھر پور امداد کرنے کے لیے تیار ہے۔ انہوں نے کہا کہ جب کبھی بھی سعودی عرب سے ایسی کوئی درخواست موصول ہوئی پاکستانی فوج کی سعودی عرب بھیچ دیا جائے گا۔ | 
یہ صفحہ دوست کو ای میل کیجیئے
پرِنٹ کریں
