یہ صفحہ دوست کو ای میل کیجیئے		پرِنٹ کریں

علی سلمان لاہور

شادی کے موقع پر صفِ ماتم بچھ گئی

شیخوپورہ کے نواحی علاقہ منڈی فیض آباد میں شادی کی ایک تقریب میں چھت گر جانے سے دولہا کی ماں اور آٹھ برس کی بچی سمیت پانچ رشتہ دار خواتین ہلاک ہو گئی ہیں جبکہ دولہا اور دیگر چار افراد زخمی ہوئے ہیں۔

اس واقعہ کے بعد شادی کی تقریب ماتم کدہ بن گئی ۔ اس گھر میں مقامی تاجر امتیاز کی شادی کے سلسلہ میں مہندی کی تقریب تھی یہ تقریب گھر کی چھت پر منعقد کی جا رہی تھی۔

مقامی رسم و رواج کے مطابق مہندی کی تقریب میں زیادہ تر خواتین ہی شرکت کرتی ہیں، گیت گاتی ہیں اور رقص کرتی ہیں۔

دولہا امتیاز کی رشتہ دار خواتین نے انہیں سامنے بٹھا کر نغمے گائے جس کے بعد دولہا کی سلامی اور صدقے کے طور پر خواتین کچھ رقم نچھاور کر رہی تھیں لیکن اسی اثناء میں کمزور چھت گر گئی۔

تھانہ منڈی فیض آباد کے ڈیوٹی افسر ارشد نے بتایا کہ پانچ خواتین موقع پر ہی ہلاک ہوگئیں جن میں دولہا امتیاز کی والدہ منور بی بی ،ممانی نسرین بی بی اور ایک آٹھ سالہ بچی مریم شامل ہیں۔

دولہا امتیاز معمولی طور پر زخمی ہوئے ہیں۔ دیگر زخمیوں کو مقامی ہسپتال پہنچا دیا گیا ہے اور شادی کی تقریبات منسوخ کر دی گئی ہیں ۔