یہ صفحہ دوست کو ای میل کیجیئے		پرِنٹ کریں

اخلاق احمد کراچی

کراچی میں مرغیوں کی بیماری کی وجہ سےعوامی سطح پرخاصی تشویش پائی جاتی ہے

کراچی میں گزشتہ ڈیڑھ ماہ کے دوران پینتیس لاکھ سے زائد مرغیوں کی ہلاکت نے عوام میں ہیجان پیدا کر دیا ہے اور یہ سوال بڑی شدومد سے پوچھا جانے لگا ہے کہ کیا دنیا میں مرغیوں کے ذریعے پھیلنے والے نئی خطرناک بیماری ’پاکستان بھی پہنچ چکی ہے؟‘

کراچی کے مضافات میں واقع سینکڑوں پولڑی فارمز گزشتہ ڈیڑھ ماہ سے اس بیماری کی زد میں ہیں۔ مقامی پولٹری پیتھالوجی لیبارٹری کے مطابق ہلاک ہونے والی لاکھوں مرغیاں ایوئین انفلوئنزا کے ایچ سات اور ایچ نو قسم کے وائرس سے متاثر ہوئی تھیں۔

یاد رہے کہ مرغیوں کی جس نئی بیماری نے ان دنوں دنیا بھر کو خوف زدہ کر رکھا ہے وہ مرغیوں سے انسانوں کو منتقل ہو کر ہلاکت کا سبب بن جاتی ہے۔ اب تک چھ افراد اس خطرناک بیماری کا شکار ہو کر ہلاک ہو چکے ہیں۔

مرغیوں کی صنعت سے وابستہ تنظیموں کا کہنا ہے کہ کراچی میں اچانک پھیلنے والی یہ بیماری صرف انڈے دینے والی یعنی لیئر مرغیوں کی ہلاکت کا سبب بنی ہے۔ کھانے میں استعمال ہونے والی برائلر مرغیاں اس بیماری سے متاثر نہیں ہوئی ہیں۔

تاہم دوسری جانب پاکستان میڈیکل ایسوسی ایشن نے اعلان کر دیا ہے کہ مرض میں مبتلا مرغی اور اس کے انڈے کھانے سے انسانی زندگی کو خطرہ لا حق ہو سکتا ہے۔ ایسوسی ایشن کے سیکرٹری جنرل نے مطالبہ کیا ہے کہ تمام متاثرہ مرغیوں کو فوری طور پر ہلاک کیا جائے۔

پولٹری ایسوسی ایشن کا کہنا ہے کہ کراچی میں ہر روز ساڑھے تین لاکھ مرغیاں ذبح ہوتی ہیں۔ تنظیم کے مطابق سوا کروڑ سے زیادہ آبادی رکھنے والے اس شہر میں مرغی استعمال کرنے والے نوے فیصد افراد برائلر مرغی خریدتے ہیں۔ متاثرہ مرغی جو برائلر کے مقابلے میں نصف قیمت پر دستیاب ہوتی ہے، غریب اور کچی آبادیوں میں استعمال کی جاتی ہے۔