یہ صفحہ دوست کو ای میل کیجیئے		پرِنٹ کریں

بھارت اور پاکستان کے درمیان دو سال تک سفارتی تعلقات منقطع رہے ہیں

پاکستان کی قومی فضائی کمپنی پاکستان انٹر نیشل ائیر لائن جمعرات کے روز سے نئی دہلی کے لیے دوبارہ براہ راست مسافر پروازوں کا سلسلہ شروع کر رہی ہے۔ اس سلسلے کی پہلی پرواز مقامی وقت کے مطابق دوپہر دو بجکر پچپن منٹ پر روانہ ہوئی۔

بوئنگ 737 کی اس پرواز پر اڑتالیس مسافر جبکہ عملے کے آٹھ ارکان موجود ہیں۔

دسمبر دو ہزار ایک میں پارلیمان پر حملے کے بعد بھارت نے پاکستان کے ساتھ اپنے تمام روابط منقطع کر لیے تھے۔ تاہم جنوب مشرق ایشیاء کے دونوں ملکوں میں سفارتی تعلقات کی بحالی کے بعد اب ذرائع آمدو رفت بھی بحال کئے جارہے ہیں اور اس سلسلے میں دونوں ملکوں کی فضائی کمپنیاں بھی مسافر پروازوں کا سلسلہ دوبارہ شروع کر رہی ہیں۔

سن دو ہزار چار کے پہلے دن پی آئی اے کی پہلی پرواز لاہور سے نئی دہلی کے لیے روانہ ہو گئی۔ سال کے دوسرے دن نئی دہلی سے انڈین ائیر لائن کی ایک خصوصی پراوز نئی دہلی سے مسافروں کو لے کر اسلام آباد پہنچے گی۔ اس خصوصی پرواز کا اہتمام سارک سربراہ کانفرس کے سلسلے میں کیا گیا ہے۔

تاہم انڈین ائیر لائن کی باقاعدہ پروازوں کا سلسلہ جنوری کی نو تاریخ سے شروع ہو جائے گا۔ انڈین ائیر لائن کم مسافت پر واقع علاقوں کے لیے مسافر پروازیں چلاتی ہے اور یہ ائیر انڈیا سے مختلف ہے تاہم یہ بھی بھارت کی سرکاری ائیر لائن ہے۔

پروازوں اور زمینی رابطوں کی بحالی کے باوجود دونوں ملکوں کے درمیان ویزا کی سختی فی الحال نرم نہیں کی جارہی ہیں۔

پی آئی اے کے ایک ترجمان عمران گردیزی نے بی بی سی کو بتایا کہ ابتدا میں پی آئی اے بھارت کے لیے ہفتے میں چھ پروازیں شروع کرئے گی۔

پاکستان کے تجارتی مرکز کراچی اور بھارت کے تجارتی مرکز ممبئی کے درمیان بھی براہ راست پروازوں کا سلسلہ شروع کرنے کےلیے منصوبہ بندی کی جا رہی ہے۔

پی آیی اے کو توقع ہے کہ مارچ تک بھارت کے لیے اس اپنی پروازوں کا سلسلہ دوگنا کرنا پڑے گا اور ہفتے میں چھ کی جگہ بارہ پروازیں چلانی پڑیں گی۔

دونوں ملک میں ذرائع امدورفت کے منقطع ہو جانے سے دونوں ملکوں کے لوگوں کو شدید مشکلات کا سامنا کرنا پڑا رہا تھا اور نئی دہلی اور لاہور کے درمیان پونے گھنٹے کے فضائی سفر کی بجائے انھیں دبئی کے راستے جانا پڑتا تھا۔

دونوں ملکوں کے درمیان بس سروس کا پہلی ہی آغاز ہو چکا ہے۔