یہ صفحہ دوست کو ای میل کیجیئے		پرِنٹ کریں

علی سلمان

ایم ایم ایم قیادت ملتان میں

متحدہ مجلس عمل نے حکومت کے خلاف احتجاجی مہم کا آغاز کر دیا ہے۔

اس سلسلے کا پہلا احتجاجی جلوس ملتان اور مظفرگڑھ میں مختصر مدت کے بعد بڑے ایک بڑی جلسے کے انعقاد کے لیے ڈیرہ غازی خان کی جانب روانہ ہوگیاہے۔

ڈیرہ غازی خان کے کمیٹی چوک میں بڑے جلسہ کے انعقاد کے بعد کارواں واپس ملتان آ جائے گا۔

مجلس عمل کا قافلہ ویگنوں، کاروں اور موٹر سائیکل سواروں پر مشتمل تھا اور گاڑیوں پر حکومت مخالف اور ایم ایم اے رہنماؤں کے حق میں بینر لگے تھے۔ قافلے کے ہمراہ رہنماؤں نے جگہ جگہ مظاہرین سے مختصر خطاب کیا۔

لوگوں نے ’گو مشرف گو ‘اور ’نامنظور نامنظور پرویز مشرف نامنظور‘ کے نعرے لگائے۔

جلوس صبح دس بجے ملتان کے کلمہ چوک سے روانہ ہوا تو چناب کے پل پر مختصر قیام کے دوران ایک جلسہ ہوا۔ دوسرا جلسہ چوک قریشیاں میں ہوا اور ایک لمبے سفر کے بعد مظفرگڑھ کے فیاض پارک میں تیسرا جلسہ ہوا۔

تینوں جلسوں سے مرکزی رہنماؤں، ایم ایم اے کے قائم مقام صدر قاضی حسین احمد، جمعیت علمائے اسلام کے سربراہ مولانا فضل الرحمان، سمیع الحق اور لیاقت بلوچ اور حافظ حسین احمد نے خطاب کیا۔

قاضی حسین احمد نے کہا کہ چاروں صوبوں کے عوام کو متحرک کرنے کا سلسلہ شروع ہوگیاہے اور یہ کام مکمل کرنے کے بعد اس عوامی قافلے کا رخ اسلام آباد کی طرف موڑ دیا جائےگا۔ انہوں نے آئین کی بحالی کا مطالبہ کیا ۔

مولانا فضل الرحمان نے کہا کہ مجلس عمل نے تشدد نہیں بلکہ دلیل کی بنیاد پر بات کی تھی لیکن حکومت نے نہیں مانی اور آئینی پیکیج پارلیمان میں پیش نہیں کیا گیا۔ ’اب مجلس کا کارواں چل پڑا ہے جو آخری کامیابی تک جاری رہےگا۔‘

جے یو آئی کے مرکزی سیکرٹری اطلاعات ریاض درانی نے بتایا کہ ڈیرہ غازی خان کے کمیٹی چوک میں خطاب کے بعد قافلہ اسی روز واپس ملتان آجائے گا ۔

اگلے روز یعنی جمعہ کو اسی طرح مختصر قیام اور جلسہ کرتے ہوئے قافلہ خانیوال ، میاں چنوں ، سے ہوتا ہوا چیچہ وطنی پہنچے گا جہاں بڑا جسلہ ہوگا اور نماز جمعہ کی ادائیگی ہوگی۔ وہاں سے ساہیوال سے ہوتا ہوا جلوس اوکاڑہ پہنچے گا اور وہاں بھی ایک بڑے جلسہ سے خطاب ہوگا۔

لاہور میں ایک دن کے آرام کے بعد قافلہ شیخوپورہ اور پھر سرگودھا کی جانب روانہ ہوجائے گا۔ ان کا کہنا تھا کہ ہر شہر سے قافلے میں شرکاء اور گاڑیوں کی تعداد بڑھتی چلی جائےگی۔