یہ صفحہ دوست کو ای میل کیجیئے		پرِنٹ کریں

عزیزاللہ خان بی بی سی اردو ڈاٹ کام، کوئٹہ

اس سال صوبہ بلوچستان تشدد کی لپیٹ میں رہا۔

فرنٹیئر کور نے کو ئٹہ چمن شاہراہ پر ایک ٹرک سے پانچ سو کلو گرام بارود تار اور فیوز برآمد کیے ہیں۔

یہ بارود کھاد سے لدے ٹرک میں چھپایا گیا تھا۔

ایف سی کے اہلکاروں نے تین افراد کو گرفتار کیا ہے۔

تفصیلات کے مطابق کوئٹہ سے کوئی اسّی کلو میٹر دور شیلا باغ چوکی پر فرنٹیئر کور کے اہلکاروں نے ایک ٹرک کو روکا جس میں کھاد لدی ہوئی تھی۔ ٹرک میں موجود افراد کے پاس کھاد کی ترسیل کے کاغذات نہیں تھے۔

دو افراد نے کہا کہ وہ ابھی دستاویزات لے آتے ہیں لیکن واپس نہیں آئے۔ اس کے بعد ایف سی کے اہلکاروں نے کھاد کی بوریاں اتارنا شروع کر دیں جس میں کوئی پانچ سو کلو گرام بارودی مواد چھپایا گیا تھا اس کے علاوہ اسی ہزار گز تار اور فیوز بھی موجود تھے۔

چمن میں تعینات فرنٹیئر کور کے ترجمان نے بتایا ہے کہ یہ سامان پنجاب سے چمن لے جایا جا رہا تھا اور یہ مواد مختلف کارروائیوں کے لیے استعمال کیا جا سکتا تھا جن میں تخریبی کارروائیاں بھی شامل ہیں۔

ترجمان نے بتایا ہے کہ گرفتار افراد سے تفتیش کی جا رہی ہے جس کے بعد معلوم ہو گا کہ یہ بارودی مواد کن مقاصد کے لیے سمگل کیا جا رہا تھا۔