یہ صفحہ دوست کو ای میل کیجیئے		پرِنٹ کریں

آزادی صحافت کے حوالے سے جنرل مشرف کو پہلے بھی تنقید کا سامنا رہا ہے

امریکہ میں قائم انسانی حقوق کے لیے کام کرنے والے ایک ادارے نے اپنی تازہ ترین رپورٹ میں کہا ہے کہ صدر جنرل پرویز مشرف کے دورِ حکومت میں اخبار نویسوں کے خلاف تشدد کے واقعات میں اضافہ ہوا ہے۔

ہیومن رائٹس واچ کی اس رپوٹ میں کہا گیا ہے کہ جب سے پاکستان میں جنرل مشرف نے اقتدار سنبھالہ ہے ذرائع ابلاغ اور اخبارات کی آزادی میں کمی واقع ہوئی ہے۔

صدر مشرف کے نام ایک کھلے خط میں اس بات پر تشویش کا اظہار کیا گیا ہے کہ پاکستان میں صحافیوں کو منظم طریقے سے ڈرایا اور دھمکایا جاتا ہے۔

اس خط میں حال ہی میں رونما ہونے والے دو واقعات کی نشاندھی کی گئی۔ اس میں کہا گیا کہ پاکستان کے ایک مقتدر جریدے ہیرلڈ کے مدیر عامر میر کو صدر نے خود تنقید کا نشانہ بنایا۔

صدر نے ہیرلڈ پر فوج کےمخالف ہونے کا الزام عائد کیا۔ اس واقعہ کے دو دن بعد کچھ نامعلوم افراد نے عامر میر کی کار کو آگ لگا دی اور عامر میر کو دھمکی آمیز خط موصول ہونا شروع ہو گئے۔

اس خط میں انسانی حقوق کی تنظیم نے بلوچستان کے صحافی رشید اعظم کا بھی ذکر کیا جنہیں بغاوت کے الزامات میں گرفتار کیا گیا تھا۔

اس تنظیم نے الزام لگایا کہ رشید اعظم کو گرفتاری کے دوران تشدد کا نشانہ بنایا گیا۔

تنظیم کے ایشیا ڈوژن کے ڈائریکٹر بریڈ ایڈمز نے کہا کہ جنرل مشرف کو ہیرلڈ کے خلاف کہے گئے کلمات سے لا تعلقی کا اظہار کرنا ہو گا اور عامر میر پر حملے کی مکمل تحقیقات کا حکم دینا ہوگا۔

انہوں نے کہا کہ صدر کو ثابت کرنا ہوگا کہ وہ معاشرے کی اصلاح کرنا چاہتے ہیں اور دوسرے فوجی آمروں سےمختلف ہیں۔