یہ صفحہ دوست کو ای میل کیجیئے		پرِنٹ کریں

عدنان عادل بی بی سی اردو ڈاٹ کام ، لاہور

سنیچر کی صبح پاکپتن شہر میں ایک طالبعلم بس کے نیچے آک ہلاک ہوگیا جس کے بعد سکول اور کالج کے طلبا نے شہر میں چند گھنٹے تک احتجاج کیا اور دکانوں اور سرکاری عمارتوں کی زبردست نقصان پہنچایا۔

بہاولنگر کے قصبہ ڈونگہ بونگہ میں دو روز پہلے طلبا کے احتجاج کے بعد یہ پنجاب کے کسی شہر میں دوسرا بڑا واقعہ ہےجس میں طلبا نے شدید احتجاج کرتے ہوۓ سڑکوں کا رخ کیا ہے۔

پاکپتن پولیس کے ایڈیشنل ایس پی قاسم نیازی نے بی بی سی کو بتایا کہ صبح ساڑھے سات بجے کے قریب پاکپتن شہر میں امر سنگھ بس اڈہ پر طلباء ایک بس میں سوا ہوکر سکول جانا چاہتے تھے۔ لیکن بس ڈرائیور انہیں بٹھانے سے یہ کہہ کر انکار کر دیا کہ طلبا زیادہ ہیں اور بس میں گنجائش کم۔

پولیس افسر کے مطابق اڈہ منیجر ذوالفقار نے ڈرائیور کو اتار کر اس کی جگہ خود بس چلانا شروع کردی او طلبا پر بس چڑھا دی جس سے ایک ساتویں جماعت کا طالبعلم محمد عمران ولد لال دین ہلاک ہوگیا اور تین طالبعلم منظور احمد، محمد عمران اور محمد اشرف زخمی ہوگۓ۔

حادثہ کی اطلاع ملنے پر شہر کے چالیس پچاس طلبا جمع ہوگۓ اور انھوں نے لاٹھیوں سے مسلح ہوکر جلوس نکالا اور جنرل بس اسٹینڈ اور دیگر بسوں کے اڈوں پر کھڑی بسوں کو نقصان پہنچایا اور ایک بس کو آگ لگا دی۔ جب طلبا نے پاس کھڑی ایک پولیس کی بس کو توڑا پھوڑا تو پولیس کو واقعہ کی اطلاع ہوئی۔

طلبا نے شہر میں تمام بازاروں میں زبردستی دکانوں کو بند کرانا چاہا اور کئی دکانوں کے شیشیے توڑ دیے۔ ضلعی ہیڈ کوارٹر ہسپتال اور تحصیل آفس میں بھی طلبا نے توڑ پھوڑ کی اور متعد دروازے اور کھڑکیاں توڑ دیں۔

طلبا ایک گھنٹے سے زیادہ شہر میں توڑ پھوڑ کرتے رہے۔ پولیس نے سات طلبا کو گرفتا رکر لیا ہے اور باقی بھاگ گۓ۔

پولیس کا کہنا ہے کہ اس نے اڈہ منیجر ذوالفقار کے خلاف قتل عمد کے جرم میں مقدمہ درج کرلیا ہے اور وہ رات تک گرفتار کرلیا جاۓ گا۔

پنجاب کے شہروں میں طلبا سکول کالج جانے کے لیے بغیر ٹکٹ کے بسوں میں سفر کرتے ہیں جس سے طلبا اور بس مالکان کے درمیان کشیدگی ہوتی رہتی ہے۔

دریں اثناء ڈونگہ بونگہ میں تھانے دار کو تبدیل کر دیا گیا ہے۔ نئے تھانے دار نے تباہ شدہ تھانے کی عمارت کا جائزہ لیا اور قصبے کے لوگوں سے مسجد کے لاوڈ اسپیکر پر امن قائم کرنے کی اپیل کی۔

پاکستان پیپلز پارٹی سے تعلق رکھنے والے ارکان قومی اسمبلی نےعلاقے میں جلسہ کیا اور پولیس اور مقامی انتظامیہ کے خلاف تقریریں کئیں۔

تاہم ابھی تک پولیس کا دیگر عملہ قصبے میں داخل نہیں ہوا ہے۔