یہ صفحہ دوست کو ای میل کیجیئے		پرِنٹ کریں

عدنان عادل بی بی سی اردو ڈاٹ کام

حکومتی ارکان پارلیمنٹ نے حزب اختلاف کی کارکردگی کو تنقید کا نشانہ بنایا ہے

حکومتی ارکان پارلیمنٹ نے قومی اسمبلی میں متحدہ حزب اختلاف کی کارکردگی کا ایک تنقیدی جائزہ پیش کرتے ہوئے الزام لگایا ہے کہ حزب اختلاف کی جماعتوں کے ارکان نے قومی اسمبلی کے پہلے پارلیمانی سال کے دوران میں پینسٹھ گھنٹے ڈیسک بجائے جس سے قوم کو بارہ کروڑ روپے کا نقصان پہنچا۔

ان خیالات کا اظہار نیشن الائنس کے مرکزی سیکرٹری اطلاعات محمد علی درانی ، پیپلز پارٹی پیٹریاٹ کے ڈاکٹر شیر افگن اور حکومتی اتحاد کے دوسرے ارکان نے جمعہ کے روز پارلیمینٹ کیفے ٹیریا میں ایک پریس کانفرنس میں کیا۔

حکومتی ارکان نے کہا ہے کہ حزب مخالف کے ارکان نے عوامی مسائل کے حل کے لیے اپنا کردار ادا کرنے کے بجائے لیگل فریم ورک آرڈر کو جواز بنا کر اسمبلی کی کاروائی کا بائیکاٹ کیا لیکن دوسری طرف تمام غیر ملکی دوروں میں حزب اختلاف کے ارکان حکومتی ارکان کے ساتھ شریک ہوئے۔

حکومتی ارکان کا کہنا تھا کہ حال ہی میں مکمل ہونے والے پارلیمانی سال کے دوران حزب اختلاف کا رویہ دوہرے معیار پر مبنی، غیر پارلیمانی اور عوامی مفادات کے منافی رہا ہے۔

ان کا کہنا تھا کہ حزب اختلاف نے جنرل پرویز مشرف کی منظوری سے ملنے والی تنخواہیں اور مراعات تو قبول کں لیکن عوامی بھلائی اور قانون سازی کے کاموں میں ہمیشہ فرار کی راہ اختیار کی۔

حکومتی ارکان پارلیمان کے مطابق حزب اختلاف نے چھ بار قومی اسمبلی کے اسپیکر امیر حسین پر حملہ کیا۔

محمد علی درانی نے حقائق نامہ جاری کرتے ہوئے کہا کہ مقدس ایوان کا راگ الاپنے والی حزب اختلاف نے قومی اسمبلی میں عوامی مسائل کی بات کرنے کے بجاۓ کیفے ٹیریا کو اپنی سیاست کے لیے منتخب کیا جو ثابت کرتا ہے کہ عوام کے سب سے بڑے فورم قومی اسمبلی پر حزب اختلاف کے اعتماد نہیں۔