یہ صفحہ دوست کو ای میل کیجیئے		پرِنٹ کریں

اسامہ بن لادن کا ابھی تک کوئی پتہ نہیں

پاکستان کے سیکیورٹی ذرائع کا کہنا ہے کہ انہوں نے صنعتی شہر فیصل آباد سے اسامہ بن لادن کے القاعدہ نیٹ ورک سے تعلق رکھنے والے تین مشتبہ افراد کو گرفتار کیا ہے۔

تین میں سو دو عرب بتائے جاتے ہیں جن کا تعلق یمن سے ہے۔

خبر رساں ایجنسی اے ایف پی کے مطابق گرفتار شدگان کو تفتیش کے لئے فوج کی خفیہ ایجنسی آئی ایس آئی کے حوالے کر دیا گیا ہے۔

اسلام آباد میں ایک سرکاری اہلکار کا کہنا ہے کہ گرفتار شدگان میں سے دو نے ہمیں بتایا کہ وہ دونوں یمنی ہیں اور ان کے پاس شناخت کے کوئی کاغذات نہیں ہیں۔

خیال کیا جا رہا ہے کہ یہ افراد وہ ہیں جو دو اکتوبر کو جنوبی وزیرستان میں آپریشن کے بعد وہاں سے فرار ہو گئے تھے۔

اس آپریشن میں آٹھ افراد ہلاک ہو گئے تھے اور اٹھارہ کے قریب گرفتار کئے گئے تھے۔

اے ایف پی کے مطابق ذرائع کا کہنا ہے کہ گرفتار ہونے والے پاکستانی شخص کا نام جاوید احمد ہے اور اس کا تعلق ایک شدت پسند تنظیم سے ہے لیکن انہوں نے اس تنظیم کا نام بتانے سے انکار کیا۔

واضح رہے کہ اوائلِ ہفتہ میں پاکستان کے وزیرِ اطلاعات شیح رشید احمد نے کہا تھا کہ افغانستان سے ملحقہ سرحدی علاقے انگور اڈہ میں آپریشن کے دوران ہلاک ہونے والے آٹھ افراد میں سے دو القاعدہ کے بہت اہم رکن تھے جن کے سروں پر انعام مقرر کیا گیا تھا۔

تاہم خبر رساں ایجنسی رائٹرز کے مطابق واشنگٹن میں ذرائع کا کہنا ہے کہ مرنے والوں میں ٹاپ ٹین یا ٹاپ ٹوینٹی مطلوب افراد میں سے کوئی بھی نہیں تھا۔

گزشتہ سال مارچ میں اسامہ بن لادن کے اہم ساتھی ابو زبیدہ کو بھی فیصل آباد میں ایک پولیس چھاپے کے دوران گرفتار کیا گیا تھا۔