یہ صفحہ دوست کو ای میل کیجیئے		پرِنٹ کریں

عدنان عادل بی بی سی اردو ڈاٹ کام، لاہور

ان ارکان اسمبلی کو تین روز پہلے بروقت اثاثوں کے گوشوارے جمع کرانے میں ناکامی پر معطل کر دیا گیا تھا

الیکشن کمیش آف پاکستان نے اثاثوں کے گوشوارے جمع کرانے پر پنجاب سے تعلق رکھنے والے ان تین ارکان صوبائی اسمبلی کی رکنیت بحال کردی تھی جنھیں دو روز پہلے معطل کردیا گیا تھا۔

بحال ہونے والوں میں ارکان صوبائی اسمبلی جواد کامران کھر، لبنی ملک اور قیصر امین بٹ شامل ہیں۔ بہاولپور سے متحدہ مجلس عمل کے رکن صوبائی اسبلی ڈاکٹر وسیم اختر اور مسلم لیگ(ق) کے رکن قومی اسمبلی اسحاق خاکوانی کی رکنیت بدستور معطل ہے۔

اسحاق خاکوانی آجکل اقوام متحدہ کی جنرل اسمبلی کے اجلاس میں شرکت کے لیے امریکہ گۓ ہوۓ ہیں اور انھوں نے الیکشن کمیشن کو باہر جانے سے پہلے ایک خط لکھا تھا کہ ان کے اثاثے وہی ہیں جو انتخابات لڑنے کے وقت کاغذات نامزدگی کے ساتھ داخل کراۓ گۓ تھے اور اب ان کے ملک واپس آنے پر یہ مسئلہ حل ہو سکے گا۔

بہاولپور سے رکن پنجاب اسمبلی ڈاکٹر وسیم نے اپنے اثاثوں کی تفصیل الیکشن کمیشن کو فیکس کے ذریعے بھیجی تھی لیکن اسے تسلیم نہیں کیا گیا۔

الیکشن کمیشن نے عوامی نمائندگی ایکٹ مجریہ انیس سو چھہتر کی شق بیالیس اے کے تحت اثاثوں کے گوشوارے جمع نہ کرانے پر ان ارکان کو معطل کیا تھا۔

قانون کے تحت ارکان اسمبلی کو تیس ستمبر تک اپنے اثاثوں کے گوشوارے جمع کرانے تھے اور آخری تاریخ میں پندرہ اکتوبر تک کی توسیع کی گئی تھی۔ آخری تاریخ گزرنے پر الیکشن کمیشن نے گوشوارے نہ جمع کرانے والے ارکان کے خلاف کاروائی کا اعلان کیا تھا۔