یہ صفحہ دوست کو ای میل کیجیئے		پرِنٹ کریں

عزیزاللہ خان بی بی سی اردو ڈاٹ کام، کوئٹہ

بلوچستان ملک کا سب سے پسماندہ صوبہ ہے

بلوچستان کی قوم پرست جماعتوں نے گوادر بچاؤ تحریک کے حوالے سے غوث بخش بزنجو سٹیڈیم گوادر میں جمعہ کے روز ایک بڑا جلسہ منعقد کیا جس میں سیاسی قائدین نے الزام لگایا کہ گوادر کو بلوچستان سے علیحدہ ایک علاقہ بنایا جا رہا ہے جس کا مقصد مقامی آبادی کو اقلیت میں تبدیل کرنا اور سمندر سے دور منتقل کرنا ہے جس سے بڑی تعداد میں مچھیرے بے روزگار ہوں گے۔

احتجاجی جلسے سے جمہوری وطن پارٹی کے قائد نواب اکبر بگٹی، بلوچستان نیشنل پارٹی کے قائد عطاءاللہ مینگل، سابق وزیراعلی سردار اختر مینگل، نیشنل پارٹی کے ڈاکٹر عبدالحئی، حاصل بزنجو، سردار ثناءاللہ زہری اور پختونخواہ ملی عوامی پارٹی کے اکرم لالہ نے خطاب کرتے ہوئے کہا ہے کہ بلوچستان کی حفاظت کے لیے تمام اقدام کیے جائیں گے۔

نواب اکبر بگٹی نے اپنی تقریر میں مختلف خدشات کا ذکر کیا ہے جن میں گوادر کے قریب جیوانی کے مقام پر نیول اور ایئر بیس کا قیام ہے۔

انھوں نے کہا ہے یہ خدشات پائے جاتے ہیں کہ امریکہ کو یہ سہولت فراہم کی جائے گی کہ وہ قریبی ممالک پر نظر رکھ سکے۔ اس کے علاوہ انھوں نے کہا ہے کہ بلوچستان کے ساحلی علاقے کو صوبے سے علیحدہ کر دیا جائے گا اور یہ کہ بلوچستان کو سمندر سے علیحدہ ایک صوبہ بنا کر اس کے حقوق غصب کیے جارہے ہیں ۔

نواب اکبر بگٹی نے کہا ہے صوبے میں پائی جانے والی دولت اور معدنیات کے محافظ صوبے کے لوگ ہیں لہذا وہ اتحاد کا مظاہرہ کریں۔ انھوں نے اس تاثر کو غلط قرار دیا ہے کہ گوادر جیسا میگا پراجیکٹ بلوچستان کے لوگوں کے لیے شروع کیا گیا ہے۔ انھوں نے کہا کہ سوئی کے مقام سے گیس انیس سو باون میں نکلی ہے اور اب اکاون سال بعد یہاں مقامی مزدوروں کی تعداد تریپن فیصد ہوئی ہے حالانکہ ان سے وعدہ کیا گیا تھا کے سو فیصد مزدور مقامی لوگ ہوں گے۔ اب گوادر کے بارے میں بھی سبز باغ دکھائے جا رہے ہیں نہ جانے ان خوابوں کا کیا ہوگا۔ یہ کہا جا رہا ہے کہ گوادر کے مقامی مچھیرے نائٹ کلبوں میں جائیں گے وغیرہ وغیرہ۔

نیشنل پارٹی کے لیڈر ڈاکٹر عبدالمالک نے گوادر سے ٹیلیفون پر بتایا ہے کہ اس تحریک کا مقصد اعلی حکام کو یہ بتانا ہے کہ گوادر اور گوادر کے لوگوں کا دفاع کیا جائے گا۔ انھوں نے کہا ہے مقامی لوگوں کو پورٹ میں ملازمتیں نہیں دی جارہیں بلکہ ریٹائرڈ اور حاضر سروس فوجیوں کو ملازمتیں فراہم کی جا رہی ہیں جو پورٹ کے بارے میں کسی قسم کا تجربہ بھی نہیں رکھتے۔ اس کے علاوہ مقامی آبادی کو اقلیت میں تبدیل کیا جا رہا ہے۔

مقامی صحافی بہرام بلوچ کے مطابق گوادر میں قوم پرست جماعتوں کا یہ بہت بڑا اجتماع تھا جس میں خواتیں نے بھی بڑی تعداد میں شرکت کی۔

یہاں یہ امر قابل ذکر ہے کہ آج سوراب میں وزیراعلی بلوچستان جام یوسف نے بھی ایک جلسے سے خطاب کیا ہے اور کہا ہے کہ حکومت نے جو وعدے کیے تھے انھیں ضرور پورا کیا جائے گا۔ انھوں نے کہا ہے کہ صوبے میں ترقی کا شاندار دور شروع ہو چکا ہے اور گوادر سمیت تمام علاقوں میں خوشحالی کا دور دورہ ہوگا۔