خضدار میں بارودی مواد پھٹنے سے دھماکہ، سات ہلاک

پاکستان کے صوبہ بلوچستان کے ضلع خضدار میں ایک مکان میں رکھا گیا بارودی مواد پھٹنے سے سات افراد ہلاک اور 14 زخمی ہوگئے ہیں۔

حکام کے مطابق یہ واقعہ تحصیل نال کے خیٹ چک نامی گاؤں میں بدھ کو پیش آیا۔

نامہ نگار محمد کاظم کے مطابق ڈپٹی کمشنر خضدار کی جانب سے جاری ہونے والے پریس نوٹ کے مطابق اس گاؤں میں حادثاتی طور پر بھڑکنے والی آگ نے جب کان کنی کے لیے ذخیرہ کیے گئے بارودی مواد کو لپیٹ میں لیا تو زوردار دھماکہ ہوا۔

حکام کے مطابق بارودی مواد پھٹنے اور آگ کی زد میں آ کر جھلسنے سے اب تک سات افراد کی ہلاکت کی تصدیق ہوئی ہے جن میں دو خواتین اور دو بچے بھی شامل ہیں۔

حادثے میں زخمی ہونے والوں میں بھی تین خواتین، چار بچے اور سات مرد شامل ہیں جن کا تعلق تحصیل نال سے ہی ہے۔

اس واقعے کی اطلاع ملتے ہیں لیویز کے اہلکار جائے حادثہ پر پہنچے اور زخمیوں کو نال اور خضدار کے سول ہسپتال منتقل کیا۔

خیال رہے کہ کان کنی بلوچستان کے عوام کا ایک اہم پیشہ ہے تاہم اس سے متعلق سامان کے لیے مناسب حفاظتی انتظامات نہ ہونے کی وجہ سے ماضی میں بھی جان لیوا حادثات پیش آتے رہے ہیں۔