پشتون ثقافت ڈے، ’سکولوں میں اتنڑ متعارف کرانے کی کوشش کروں گا‘
پاکستان کے صوبہ بلوچستان کے دارالحکومت کوئٹہ اور دیگر علاقوں میں 23 ستمبر کو عالمی پشتون ثقافت کے دن کے طور پر منایا گیا۔
کوئٹہ شہر میں اس حوالے سے مختلف تقاریب کا انعقاد کیا گیا۔
23 ستمبر کو پشتون ثقافت کے دن کے طور پر منانے کا فیصلہ عالمی پشتو سیمنار میں کیا گیا تھا جو کہ 12 سے 14ستمبر تک کوئٹہ میں منعقد ہوا۔
کوئٹہ شہر میں اس مناسبت سے سب سے بڑی تقریب کوئٹہ میٹروپولیٹن کارپوریشن کی سبزہ زار پر منعقد ہوئی۔ اس تقریب میں لوگوں کی ایک بڑی تعداد نے شرکت کی جن میں بچے بھی شامل تھے۔
لوگوں نے نہ صرف اس دن کی مناسبت سے روایتی پگڑی پہن رکھی تھی بلکہ روایتی لباس بھی زیب تن کیا ہوا تھا۔
تقریب کے مہمان خصوصی وزیر اعلیٰ بلوچستان ڈاکٹر عبدالمالک بلوچ تھے۔ تقریب سے خطاب کرتے ہوئے وزیر اعلیٰ نے کہا کہ ان کی حکومت نے مادری زبانوں کو ذریعہ تعلیم بنایا ہے۔
انھوں نے کہا کہ وہ کوشش کریں گے کہ سکولوں میں روایتی اتنڑ (پشتون رقص) کو بھی متعارف کرائیں تاکہ ہمارے بچے بھی اپنی ثقافت سے آگاہ ہوں۔
’ہمیں پشتو موسیقی، رباب اور بلوچی موسیقی کے سروز کو زندہ کرنا ہوگا کیونکہ موسیقی سے انسان کو سکون ملتا ہے۔‘
End of سب سے زیادہ پڑھی جانے والی
صوبائی وزیر اطلاعات عبدالرحیم زیارت وال نے تقریب سے خطاب کرتے ہوئے کہا کہ دنیا میں بسنے والے تمام پشتونوں کے لیے 23 ستمبر تاریخی اہمیت کا حامل ہے۔
اس دن کو پشتون ثقافت کے دن کے طور پر منانے کا فیصلہ پشتو عالمی کانفرنس کے موقعے ہوا تھا جس کو انھوں نے عملی جامہ پہناتے ہوئے آج کے دن تقریبات کا اہتمام کیا۔
