خیبر ایجنسی میں فضائی بمباری سے48 شدت پسند ہلاک
،تصویر کا ذریعہBBC Urdu
پاکستانی فوج کا کہنا ہے کہ قبائلی علاقے خیبر ایجنسی کی وادیِ تیراہ میں فضائی کارروائی کے دوران 48 شدت پسندوں کو ہلاک کر دیا گیا ہے۔
فوج کے شعبہ تعلقاتِ عامہ آئی ایس پی آر کی جانب سے موصول ہونے والے تحریری بیان کے مطابق خیبر ایجنسی کی وادیِ تیراہ میں موجود دہشت گردوں کے خلاف ’ٹھیک نشانے‘ سے فضائی بمباری کی گئی۔
بتایا گیا ہے کہ جمعے کی صبح ہونے والی اس بمباری میں 48 شدت پسند ہلاک ہوئے۔
یاد رہے کہ خیبر ایجنسی میں ہی گذشتہ سال اکتوبر میں خیبر ون کے نام سے باقاعدہ فوجی آپریشن شروع کیا گیا تھا جبکہ اس سے پہلے بھی وادی تیراہ میں سکیورٹی فورسز کی کارروائیاں جاری تھیں۔
خیبر ایجنسی تین سب ڈویژنوں باڑہ، جمرود اور لنڈی کوتل پر مشتمل ہے۔
پاکستانی فوج نے شمالی وزیرستان میں جاری آپریشن ضربِ عضب سمیت آپریشن ’خیبر ون ‘ کے بارے میں کہا تھا کہ ان علاقوں میں اُس وقت تک فوج کی کارروائیاں جاری رہیں گی جب تک وہاں سے دہشت گردوں کا مکمل خاتمہ نہیں ہو جاتا۔
فوجی حکام کا کہنا ہے کہ شمالی وزیرستان میں جاری آپریشن ضرب عضب کے دوران شدت پسند بھاگ کر خیبر ایجنسی منتقل ہو گئے تھے اور اسی وجہ سے خیبر ایجنسی میں آپریشن شروع کیا ہے۔
اس فوجی آپریشن اور سکیورٹی فورسز کی کارروائیوں کی وجہ سے مختلف علاقوں سے لوگ بڑے پیمانے پر نقلِ مکانی کرنے پر مجبور ہوئے ہیں۔
End of سب سے زیادہ پڑھی جانے والی
