قومی ایکشن پلان عملدرامد: 15 ذیلی ورکنگ گروپس قائم

وزیراعظم نواز شریف نے ملک میں دہشت گردی کے خاتمہ کے لیے قومی لائحہ عمل پر عملدرآمد کے لیے 15 ذیلی ورکنگ گروپ قائم کر دیے ہیں۔

وزیر اعظم میاں نے دہشت گردی کے خاتمے کے لیے قائم کیے جانے والے انسداد دہشت گردی کے قومی ایکشن پلان کے ایک اجلاس کی صدارت کی۔

سرکاری ذرائع ابلاغ کے مطابق جو ورکنگ گروپس بنائے گئے ہیں وہ مندرجہ ذیل ہیں:

وزیر اعظم نے اس موقعے پر کہا کہ ’حکومت شرپسند عناصر کے خلاف اپنے فولادی عہد پر قائم ہے اور تمام ضروری اقدام کرنے کی پابند ہے تاکہ پشاور میں بہنے والا خون رائیگاں نہ جائے۔‘

وزیراعظم نے مختصر مدت میں زیادہ سے زیادہ نتائج حاصل کرنے کے لیے قانون نافذ کرنے والے اداروں اور وفاقی اور صوبائی حکومتوں کے درمیان براہ راست رابطے اور تعاون پر زور دیا۔

واضح رہے کہ وزیراعظم کی ہدایت پر دہشت گردی سے نمٹنے والے ادارے نیکٹا کو زیادہ فعال بنايا جائے گا۔ اس سلسلے میں مجلس عاملہ کا اجلاس بدھ کو طلب کیا گیا ہے جو و‌فاقی وزیر داخلہ کی صدارت میں ہو گا۔

اس اجلاس کے دوران پشاور حملے میں ’ملوث دشمن جنگجوؤں، دہشت گردوں اور اس میں مالی تعاون دینے والوں‘ کے متعلق آئینی اور قانونی ترامیم کا پہلا مسودہ وزیر اعظم کو پیش کیا گيا۔

وزیر اعظم نے کہا کہ ’دہشت گردی کے خلاف جنگ میں ہماری فوج کے جوانوں کو قانونی تحفظ فراہم کرایا جائے گا۔‘

انھوں نے اپنی قانونی ٹیم سے کہا کہ دیگر سیاسی جماعتوں کو بھی یہ مسودہ دکھایا جائے اور ان سے بھی اس پر رائے لی جائے۔

انھوں نے اس ترامیم میں دہشت گردی کے واقعات اور اقلیتوں کے خلاف نسلی تشدد کو بھی شامل کرنے کی ہدایات دیں۔

انھوں نے کہا کہ وہ پاکستان کو تمام پاکستانیوں کے لیے بلا تفریق مذہب و نسل محفوظ دیکھنا چاہتے ہیں۔

اس اجلاس میں وفاقی وزیر مالیات اسحاق ڈار، وفاقی وزیر منصوبہ بندی احسن اقبال، وزیر اعظم کے مشیران عرفان صدیقی، خواجہ ظہیر احمد، بیرسٹر ظفراللہ اور اٹارنی جنرل نے شرکت کی۔