آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
خاتون ٹیچر ’سابق بوائے فرینڈ‘ کی نازیبا ویڈیو شیئر کرنے کے الزام میں گرفتار
- مصنف, ریاض سہیل
- عہدہ, بی بی سی اردو ڈاٹ کام، کراچی
پاکستان کے سب سے بڑے شہر کراچی میں وفاقی تحقیقاتی ادارے ایف آئی اے نے ایک خاتون کو اپنے ’سابقہ بوائے فرینڈ‘ کی نازیبا ویڈیو اور تصاویر شیئر کرنے کے الزام میں گرفتار کیا ہے۔
ایف آئی اے سائبر کرائم ونگ نے متاثرہ شخص کی مدعیت میں مقدمہ درج کیا جس میں انھوں نے خاتون پر بلیک میلنگ اور ہراس کرنے کے الزامات عائد کیے ہیں۔
مدعی کے مطابق خاتون ان کی سابقہ گرل فرینڈ ہیں۔
مدعی نے ایف آئی اے کو بتایا ہے کہ ان کی سابقہ گرل فرینڈ سے ان کی چھ سال سے دوستی تھی اور اس عرصے میں وہ ان کے گھر بھی جاتے رہے اور وہ دونوں واٹس ایپ کے ذیعے رابطے میں تھے۔
مدعی نے الزام عائد کیا کہ خاتون نے ویڈیو پر انھیں بے لباس ہونے کو کہا اور پھر ان کی ویڈیو ریکارڈ کرلی جس سے وہ لاعلم تھے۔
انھوں نے کہا کہ کچھ دنوں کے بعد خاتون نے رقم کا تقاضہ کیا اور جب انھوں نے انکار کیا تو اُس نے بلیک میلنگ شروع کردی اور ان کی ویڈیو فیس بک پر ڈال دی۔
اسی حوالے سے مزید پڑھیے
End of سب سے زیادہ پڑھی جانے والی
ایف آئی اے میں درج ایف آئی آر کے مطابق اس شکایت کی تصدیق کے بعد خواتین افسر اور اہلکاروں پر مشتمل ٹیم نے نیو کراچی میں ایک مقام پر چھاپا مارا اور خاتون کو ان پر عائد الزامات کی تفصیلات سے آگاہ کیا جسے انھوں نے قبول کرنے سے انکار کیا۔
ایف آئی اے کی ٹیم نے اس خاتون سے موبائل فون ان کے حوالے کرنے کا مطالبہ کیا اور ٹیم نے تین فون ضبط کیے ہیں۔
حکام کے مطابق اس خاتون کو بعد میں ایف آئی اے سائبر سیل میں لایا گیا جہاں دوران تفیش یہ بات معلوم ہوئی کہ ان کے موبائل میں فیس بک کی وہ آئی ڈی فعال تھی جس کے ذریعے نازیبا ویڈیو براڈ کاسٹ کی گئی اور وہ ویڈیو فون پر بھی موجود تھی۔
ایڈیشنل ڈائریکٹر سائبر کرائم سرکل کے مطابق گرفتار خاتون ایک سکول میں پڑھاتی ہیں اور مبینہ طور پر اس سے قبل مدعی کے ایک اور قریبی رشتہ دار کو بھی اسی طرح بلیک میل اور ہراساں کرچکی ہیں۔
