شریف فیملی کیس: ’نیب کو بتانا ہو گا کہ بچے کس کے زیر کفالت تھے‘

سابق وزیر اعظم میاں نواز شریف، ان کی بیٹی مریم نواز، اور داماد کیپٹن ریٹائرڈ محمد صفدر کو احتساب عدالت سے ملنے والی سزاؤں کو معطل کرنے سے متعلق درخواستوں کی سماعت کرنے والے اسلام آباد ہائی کورٹ کے جج جسٹس اطہر من اللہ نے ریمارکس دیے ہیں کہ بادی النظر میں احتساب عدالت نے اپنے فیصلے میں یہ بات مفروضے پر کی ہے کہ بچے والدین کے زیر کفالت ہوتے ہیں۔

عدالت کا کہنا تھا کہ مفروضے کی بنیاد پر فوجداری مقدمات میں دی جانے والی سزا برقرار نہیں رہ سکتی۔

نامہ نگار شہزاد ملک کے مطابق جسٹس اطہر من اللہ نے کہا کہ ہمارے معاشرے میں مشترکہ خاندانی نظام ہے اور اس ضمن میں بار ثبوت نیب کے ذمے ہے کہ وہ یہ بتائے کہ میاں نواز شریف کے بچے اپنے والد کے زیر کفالت تھے یا اپنے دادا کے۔

یہ بھی پڑھیے

’وہ بیگم کلثوم سے نواز اور مریم کی آخری ملاقات تھی‘

’کلثوم نواز نہ ہوتیں، تو نواز شریف باہر نہ جا سکتے‘

جسٹس اطہر من اللہ نے ریمارکس دیتے ہوئے کہا کہ نیب کو بتانا ہو گا کہ بچے کس کے زیر کفالت تھے۔

سماعت کے دوران عدالت نے سوال اُٹھایا کہ کیا کوئی ایسی دستاویز ہے جو نواز شریف کے فلیٹس کی ملکیت ظاہر کرے جس پر مجرم نواز شریف کے وکیل خواجہ حارث نے کہا کہ پراسیکیوشن، گواہوں، واجد ضیا اور تفتیشی اہلکاروں میں سے کسی نے ایسی کوئی دستاویز پیش نہیں کی۔

جسٹس اطہر من اللہ نے استفسار کیا کہ کیا کبھی زیر کفالت کو سزا ہوئی ہے؟ عدالت نے یہ بھی استفسار کیا کہ کیا فرد جرم میں بے نامی کا ذکر ہے جس پر خواجہ حارث کا کہنا تھا کہ فرد جرم سزا سے یکسر مختلف ہے۔

اُنھوں نے کہا کہ فرد جرم میں شریف خاندان کو مالک ظاہر کیا گیا، اور بعد میں صرف نواز شریف کو مالک ظاہر کردیا گیا۔ اُنھوں نے کہا کہ نواز شریف کسی مرحلے پر بھی خاندانی کاروبار سے منسلک نہیں رہے۔

نواز شریف کے وکیل کا کہنا تھا کہ احتساب عدالت کی طرف سے عائد کی گئی فرد جرم اور سزا میں واضح تضاد ہے۔

بینچ کے سربراہ نے استفسار کیا کہ کیا ریکارڈر پر کوئی ثبوت ہے کہ بچے نواز شریف کے زیر کفالت تھے جس پر خواجہ حارث کا کہنا تھا کہ ریکارڈ پر ایسا کوئی ثبوت موجود نہیں ہے۔

اُنھوں نے کہا کہ جے آئی ٹی کے سربراہ واجد ضیا نے اپنے بیان میں کہا کہ بچوں کے زیر کفالت ہونے سے متعلق کوئی ثبوت نہیں ملا۔

خواجہ حارث کا کہنا تھا کہ جہاں کہیں بھی پراپرٹیز کا ذکر ہے تو وہاں پر نواز شریف کے بچوں کا نام آتا ہے نواز شریف کا نہیں۔ اُنھوں نے کہا کہ فیصلے میں ایک سے زیادہ چیزیں مفروضوں پر مبنی ہیں۔

جسٹس اطہر من اللہ نے ریمارکس دیتے ہوئے کہا کہ سزا بے نامی دار پر ہوئی، زیر کفالت کے معاملے پر نہیں۔ اُنھوں نے کہا کہ مریم نواز کو ٹرائل کورٹ نے بینفشل اونر قرار دے کر والد کی پراپرٹی چھپانے پر سزا سنائی۔

خواجہ حارث کے دلائل مکمل ہونے کے بعد مریم نواز اور کیپٹن ریٹائرڈ محمد صفدر کے وکیل امجد پرویز نے بھی احتساب عدالت کے فیصلے کے خلاف دلائل دیے۔