آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
بیگم کلثوم نواز کی طبیعت دل کا دورہ پڑنے سے بگڑ گئی، آئی سی یو میں منتقل
سابق وزیر اعظم نواز شریف کی لندن میں زیرِ علاج اہلیہ بیگم کلثوم نواز کی صحت دل کا دورہ پڑنے کے بعد مزید بگڑ گئی ہے۔
بیگم کلثوم نواز کی بگڑتی صحت پر پاکستان کی مختلف سیاسی جماعتوں کے رہنماؤں نے ان کی صحت یابی کے لیے نیک تمناؤں کے پیغامات دیے ہیں۔
جمعرات کی شب نواز شریف کی بیٹی مریم نواز نے سماجی رابطوں کی ویب سائٹ ٹوئٹر پر اطلاع دی کہ کلثوم نواز کو دل کا دورہ پڑا ہے اور وہ اس وقت انتہائی نگہداشت کے یونٹ میں ہیں اور انھیں مصنوعی طریقے سے سانس دیا جا رہا ہے۔
مزید پڑھیے
خیال رہے کہ بیگم کلثوم نواز کو چند ماہ قبل کینسر کی تشخیص ہوئی تھی اور وہ اس وقت برطانیہ میں زیر علاج ہیں۔
بیگم کلثوم نواز کے دونوں صاحبزادے حسن اور حسین مسلسل ان کے ساتھ ہیں لیکن ان کے شوہر اور ان کی بیٹی مریم نواز اسلام آباد کی احستاب عدالت سے اجازت ملنے کے بعد جمعرات کو لندن پہنچے تھے۔
End of سب سے زیادہ پڑھی جانے والی
ان کی بیٹی مریم نواز نے ٹوئٹر پر اپنی والدہ کی بگڑتی ہوئی صحت کے بارے میں لکھتے ہوئے کہا، ’ہم جہاز میں تھے جب امی کو اچانک دل کا دورہ پڑا۔ اب وہ آئی سی یو میں وینٹیلیٹر پر ہیں۔ آپ سب سے التجا ہے کہ ان کے لیے دعا کریں۔‘
بیگم کلثوم نواز نے گذشتہ سال لاہور کے حلقے این اے 120 سے انتخابات میں کامیابی حاصل کی تھی لیکن اپنی طبیعت کی خرابی کی وجہ سے وہ انتخابی مہم نہیں چلا پائی تھیں بلکہ انھوں نے رکن قومی اسمبلی کی حیثیت سے حلف بھی نہیں اٹھایا تھا۔
پاکستان تحریک انصاف کے سربراہ عمران خان نے ٹوئٹر پر کلثوم نواز کے لیے دعائیہ الفاظ میں کہا کہ ’اللہ انھیں صحت عطا کرے۔‘
سابق صدر آصف علی زرداری نے اپنے پیغام میں کہا ہے کہ بھٹو خاندان اور پیپلز پارٹی کی جانب سے بیگم کلثوم نواز کی صحت یابی کے لیے دعا کی ہے۔
پاکستان پیپلز پارٹی کے رہنما بلاول بھٹو زرداری نے اپنی ٹویٹ میں لکھا، ’میری دعائیں بیگم کلثوم نواز کے ساتھ ہیں۔ اللہ انہیں صحت مند اور لمبی عمر دیں۔‘
خیال رہے کہ جب سنہ 1999 میں نواز شریف جنرل پرویز مشرف کے مارشل لا کے بعد جیل چلے گئے تھے۔ اس دور میں سیاسی جدوجہد کے دوران اخبارات میں شائع ہونے والی بیگم کلثوم نواز کی ایک تصویر مزاحمت کی علامت بن گئی تھی۔
بیگم کلثوم نواز کا خاندان کشمیر سے تعلق رکھتا ہے جبکہ ان کی پیدائش لاہور میں ہوئی۔
