قمر احمد کراچی

	بش کرکٹ میچ کے دوران بیٹنگ کرتے ہوئے

بش کے چوکے چھکے

صدر بش واحد امریکی صدر نہیں جن کا واسطہ کرکٹ سے پڑ رہا ہے۔ ٹیسٹ کرکٹ کی 129 سالہ تاریخ میں آئزن ہاور وہ واحد امریکی صدر ہیں جنہوں نے کوئی بین الاقوامی ٹیسٹ میچ دیکھا تھا۔

امریکی صدر نے سنہ اٹھاون میں اپنے دورۂ پاکستان کے دوران کراچی کے نیشنل سٹیڈیم میں اس وقت کے پاکستانی صدر ایوب خان کے ہمراہ آسٹریلیا اور پاکستان کے مابین کھیلا جانے والا ٹیسٹ میچ دیکھا تھا۔

اس موقع پر امریکی صدر کو پاکستانی ٹیم کا بلیزر پیش کیا گیا اور جسے پہنا دیکھ کر آسٹریلوی کپتان رچی بینو نے کہا تھا کہ ’جنابِ صدر کیا آپ مخالف ٹیم میں شامل ہوگئے ہیں‘۔ اس کے بعد آئزن ہاور کو آسٹریلوی ٹیسٹ کیپ بھی پیش کی گئی۔

	ٹیسٹ کرکٹ دیکھنے والے واحد امریکی صدر آئزن ہاور

پاکستانی ٹیم سے ملاقات کے بعد آئزن ہاور نے صدر ایوب سے کہا کہ ’میں ایک امریکی ہوں اور میرے ملک میں کرکٹ نہیں کھیلی جاتی لیکن میں جانتا ہوں کہ کرکٹ گھاس پر کھیلی جاتی ہے لیکن یہ میدان میں کیا ہے؟‘۔

اس وقت پاکستان میں کرکٹ’مینگ وکٹ‘ پر کھیلی جاتی تھی۔ صدر ایوب اس سوال پر خاصے برہم ہوئے اور کپا کہ ملک میں پانی کی کمی کی وجہ سے کرکٹ ’ٹرف وکٹوں‘ پر نہیں کھیلی جا سکتی۔

اس واقعے کے فوراً بعد پاکستانی صدر نے ایک حکم جاری کیا کہ ملک کے تمام سٹیڈیموں کی وکوں کو ’ٹرف وکٹوں‘ میں تبدیل کر دیا جائے اور یوں ایک امریکی صدر کے بیان نے پاکستانی کرکٹ کا ڈھانچہ تبدیل کر دیا۔