امریکہ اور برطانیہ میں فنکار سونامی کے متاثرین کے لیے رقوم جمع کر رہے ہیں

پندرہ جنوری کو ہونے والے اس طویل ٹیلی وژن پروگرام میں جارج کلونی، کیون سپیسی اور اوما تھرمن نے بھی شرکت کا وعدہ کیا ہے۔

اس شو سے حاصل ہونے والی آمدنی امریکی ریڈ کراس کو جائے گی جو ایشیا میں سونامی کے حوالے سے امدادی کام کر رہی ہے۔

لاطینی امریکہ سے تعلق رکھنے والے گلوکار رکی مارٹن بدھ کے روز تھائی لینڈ کا دورہ کر رہے ہیں تا کہ وہ سونامی سے پھیلی تباہی کو خود دیکھ سکیں۔وہ تھائی لینڈ میں چار روز گزاریں گے جہاں پانچ ہزار سے زائد افراد ہلاک ہوئے تھے۔

متاثرین کے لیے رقوم جمع کرنے کی مہم میں اداکارہ اور پوپ گلوکارہ ہیلری ڈف بھی شامل ہیں۔

برطانیہ میں بھی بائیس جنوری کو موسیقی کا ایک بڑا شو کرایا جا رہا ہے جس میں ایرک کلپٹن مینک، سٹریٹ پریچرز اور جولز ہالینڈ سمیت کئی فنکار شرکت کر رہے ہیں۔ یہ شو برطانیہ کے شہر کارڈف میں واقع میلینیم سٹیڈیم میں ہوگا جس میں پینسٹھ ہزار افراد کی شرکت متوقع ہے۔