لڑائی کے بعد فلوجہ کی ویران گلیاں(فائل فوٹو)

عراق کی عبوری حکومت نے دو ہزار افراد کو واپس آنے کی اجازت دی تھی۔
جمعرات کو حکام کے اندازے سے بہت کم لوگ جن کی تعداد پانچ سو سے کم ہے تباہ حال شہر میں واپس آئے۔

واپس آنے والوں کو امریکی اور عراقی حکام کی طرف سے سخت سکیورٹی انتظامات کا سامنا کرنا پڑا۔

اسی دوران جمعرات کو شہر میں امریکی فوجیوں اور مزاحمت کاروں کے درمیان جھڑپیں بھی جاری رہیں جن میں تین امریکی فوجی ہلاک ہوئے۔

فلوجہ واپس آنے والے افراد شہر میں تباہی کا منظر دیکھ کر سہم گئے۔ ایک شہری اسد نے اپنے گھر کی حالت دیکھ کر کہا کہ ’یہ تباہی ہے۔ ادھر کوئی بھی نہیں رہ سکتا، یہاں نہ بجلی ہے نہ پانی‘۔ ’ہمارے گھر اور دکانیں تباہ ہو گئی ہیں۔ یہ سب کچھ دوبارہ بنانے میں کتنا وقت لگ جائے گا؟‘

حکام نے لوگوں کو پانی، خوراک اور ایندھن کی فراہمی کی بات کی ہے۔ لیکن یہ نہیں کہا جا سکتا کہ زیادہ تعداد میں لوگوں کی واپسی سے پہلے حالات کیسے معمول پر آئیں گے جبکہ شہر میں ابھی لڑائی بھی جاری ہے۔

دریں اثناء حال ہی میں موصل میں امریکی کیمپ پر ہونے والے حملے کے بارے میں امریکی فوج نے کہا کہ حملہ کرنے والا خود کش عراقی فوج کی وردی پہنے ہوئے تھا۔