یاسر عرفات کی مقبوضہ علاقوں میں زبردست حمایت ہے

کیا یاسر عرفات اب بھی اہم ہیں؟
یاسر عرفات کچھ سالوں سےایک تنہا شخص کی تصویر پیش کر رہے ہیں۔ اسرائیلی فوج نے انہیں سن دو ہزار ایک سے رملہ میں ان کے صدر دفتر میں محصور کیا ہوا ہے۔ امریکہ اور اسرائیل ان سے بات نہیں کرنا چاہتے۔

ان کی فلسطینی اتھارٹی کو زیادہ تر فلسطینی بدعنوان اور نااہل سمجھتے ہیں۔ لیکن اس کے باوجود وہ اب بھی مقبول ترین سیاستدان ہیں اور فلسطینی تحریک کے رہبر ہیں۔

وہ واحد رہنما ہیں جو فلسطینی کے نام پر کوئی سمجھوتہ کر سکتے ہیں۔

کیا ان کے جانشین کا تعین ہو چکا ہے؟
فلسطینی اتھارٹی یا ان کی تنظیم پی ایل او میں جانشینی کا طریقۂ کار واضح نہیں ہے۔ انہوں نے نائب یا جانشین نامزد نہیں کیا۔

فلسطینی اتھارٹی کے قانون کے تحت فلسطین کی قانون ساز اسمبلی کے سپیکر نئے صدر کے انتخاب تک ساٹھ دن کے لیے صدارت سنبھال لیں گے۔

جانشینی کی امیدوار کون کون ہیں؟
فلسطینیوں کے لیے ایک مسئلہ یہ ہے کہ ان کی طاقت کے بہت سے مراکز مقبوضہ علاقوں میں ہیں۔

ان کے ممکنہ جانشینوں میں پی ایل او کے جنرل سیکرٹری محمود عباس، مقامی رہنما اور سلامتی کے امور کے سابق سربراہ محمد داہلان اور انتفادہ کے سربراہ مروان برغوتی شامل ہیں جو اسرائیل میں قید ہیں۔

اقتدار کے لیے کھینچا تانی کا کیا امکان ہے؟
اس کا امکان موجود ہے۔ جولائی میں فلسطینی دھڑوں میں غزہ اور غرب اردن میں جھڑپیں بھی ہوئی تھیں جن میں ایک دوسرے کے ارکان اغوا کیے گئے تھے۔

ایسی صورتحال میں یاسر عرفات کی موت کا حماس جیسی تنظیموں کو فائدہ ہوگا کیونکہ حماس منظم اور متحد تنظیم ہے۔

حماس اور اسلامی جہاد نے یاسر عرفات کو کبھی نشانہ نہیں بنایا لیکن ضروری نہیں کہ نئی قیادت کے ساتھ بھی ان کا یہی رویہ ہو۔

اسرائیل کا رد عمل کیا ہوگا؟
زیادہ تر اسرائیلی یاسر عرفات کو دہشت گرد سمجھتے ہیں۔ ان کے خیال میں وہ ناقابل اعتبار ہیں۔

بہت سے لوگ یاسر عرفات کی موت سے خوش ہوں گے۔ کئی ایک نے تو ان کی ملک بدری اور ہلاکت کی صلاح بھی ہو سکتا ہے دی ہو۔

لیکن مقبوضہ علاقوں میں غیر یقینی ماحول فلسطینیوں کے رویہ کو مزید سخت کر دے گا جو اسرائیل کے لیے اچھا نہیں۔

یاسر عرفات کی عدم موجودگی میںغزہ کے کچھ علاقے خالی کرنے کے لیے ایریئل شیرون کے منصوبے میں تاخیر ہو سکتی ہے۔ فلسطینی اتھارٹی میں قیادت کے خلا سے غزہ کی پٹی پر حماس کا کنٹرول ہو جائے گا۔