چیچنیا کے دارالحکومت گروزنی سے موصولہ اطلاعات کے مطابق دوسری جنگِ عظیم میں سوویت یونین کی فتح کی ساگرہ کے موقع پر اسٹیڈیم میں منائی جانے والی تقریبات کے دوران بم دھماکے کےنتیجے میں چیچنیا کے صدر احمد قادیروف ہلاک ہو گئے ہیں۔ اس بات کا انکشاف ماسکو سے ملنے والی خبروں میں کیا گیا ہے جن میں کہا گیا ہے کہ صدر پوتن نے چیچنیا کے صدر کی ہلاکت کی تصدیق کر دی ہے۔ دھماکے میں تیس سے زائد افراد ہلاک ہو گئے ہیں۔ ابھی تک اس بات کی تصدیق نہیں ہو سکی کہ دھماکے میں شدید زخمی ہونے والے چیچنیا میں موجود روسی فوجی کمانڈر ویلری بیرانوف ہلاک ہوئے ہیں یا ابھی زندہ ہیں۔ روسی حکام نے ان کی ہلاکت کی تردید کی ہے اور کہا ہے کہ وہ ہسپتال میں زندگی اور موت کی جنگ لڑ رہے ہیں۔ تاہم کئی ذرائع یہ رپورٹ کر چکے ہیں کہ وہ بھی دھماکے میں ہلاک ہو چکے ہیں۔ اطلاعات کے مطابق یہ دھماکہ وی آئی پی ایئریا میں بارودی سرنگ پھٹنے سے ہوا ہے۔
 |  چیچن صدر احمد قادیروف |
گروزنی میں منائی جانے والی یہ تقریبات ہر برس نو مئی کو روس بھر میں یوم فتح کے موقع پر ہونے والی فوجی پریڈوں کا حصہ تھیں۔صدر پوتن نے دھماکے میں ہلاک ہونے والے چیچن صدر کو خراجِ عقیدت پیش کیا اور کہا کہ انہوں نے ثابت کیا ہے کہ ڈاکوؤں، دہشت گردوں اور عام لوگوں میں کوئی مماثلت نہیں۔ چیچنیا میں ہونے والے دھماکے کی خبر آنے سے پہلے روس کے صدر ولیدی میر پوتن نے ماسکو میں یوم فتح کی تقریبات کے موقع پر کہا تھا کہ ہمارا نیا دشمن بین الاقوامی دہشت گردی ہے اور اس سے نمٹنے کی فوری ضرورت ہے۔ | 
یہ صفحہ دوست کو ای میل کیجیئے
پرِنٹ کریں
