عارف وقار بی بی سی اردو ڈاٹ کام، لاہور

	امریکی صدر کا پسندیدہ محاورہ

To bite the bullet
اس سے مُراد ہے کسی افتاد کا خندہ پیشانی سے مقابلہ کرنا، کسی بڑی مصیبت کو صبر و تحمل سے برداشت کرلینا، کسی تکلیف کو واویلا کیے بغیر سہہ جانا ۔

یہ محاورہ تو خاصا پرانا ہے لیکن امریکی صدر فورڈ کے زمانے میں اسے ایک نئی زندگی اُس وقت عطا ہوئی جب روز افزوں مہنگائی کا مقابلہ کرنے اور اقتصادی بحران سے نکلنے کے موضوع پر صدر نے ٹیلی وژن پر قوم سے خطاب کرتے ہوئے کہا کہ افراطِ زر کو روکنے کے لئیے ملک کے ہر باشندے کو قربانی دینی ہوگی:
“ Do whatever is necessary to fight inflation, no matter how unpleasant. Eat less, use less gasoline, spend less, save more…. bite the bullet.”

اس سے پہلے1968 میں صدر نکسن نے بھی کانگریس سے خطاب کرتے ہوئے کچھ اسی طرح کی نصیحت کی تھی۔ صدر نے انکم ٹیکس میں دس فیصد اضافے کی اپنی تجویز منظور کرانے کے لئے اراکینِ کانگریس سے کہا تھا:
Bite the bullet
یعنی یہ کڑوا گھونٹ تمہیں پینا ہی پڑے گا۔

چلیئے یہ تو واضح ہو گیا کہ بندوق کی گولی چبانے سے مراد کیا ہے لیکن یہ محاورہ بنا کسطرح؟ یعنی کارتوس کو چبانے سے مشکل کی گھڑی کیسے ٹل سکتی ہے؟

اس کے لئے ہمیں ذرا ماضی میں جانا پڑے گا۔
یہ بات تو آپکے مشاہدے میں بھی آئی ہو گی کہ شدید تکلیف کے دوران لوگ مُٹھیاں بھینچتے ہیں، دانت کچکچاتے ہیں یا انگلی منہ میں ڈال کر زور سے کاٹتے ہیں ، ایسا کرنے سے انکی توجہ درد سے ہٹ جاتی ہے۔

	بندوق اور پستول والی گولیاں

آج ہمیں درد مٹانے کی زود اثر دوائیں میسّر ہیں۔ جِسم کو مقامی طور پر ُسنّ کرنے یا دماغی عمل کو عارضی طور پر معطل کرکے درد کا احساس ختم کرنے کے انجکشن بھی موجود ہیں چنانچہ آج کے سپاہی کو میدانِ جنگ میں ہنگامی سرجری کے دوران گولی چبانے کی ضرورت نہیں پڑتی لیکن جو بات عرصہ دراز تک کسی زبان کا حصّہ بنی رہے اسے آسانی سے زبان بدر نہیں کیا جاسکتا۔ بُلیٹ چبانے کا رواج عملاً بھلے ختم ہوگیا ہو محاورے میں جوں کا توں موجود ہے۔

آخر میں اس محاورے کے استعمال کی ایک تازہ مثال بھی دیکھ لیجئے:

If they want to cut the budget deficit, they are going to have to bite the bullet and find new sources of revenue.